वीरगञ्ज । वीरगञ्जस्थित नेशनल मेडिकल कलेज तथा शिक्षण अस्पतालको संयुक्त सहकार्यमा बाराको कलैयामा सञ्चालित एकदिने निःशुल्क मुटुरोग स्वास्थ्य शिविर सम्पन्न भएको छ । शिविरबाट २९५ जना स्थानीय नागरिकले मुटुरोगसम्बन्धी विशेषज्ञ स्वास्थ्य परीक्षण तथा निःशुल्क परामर्श सेवा प्राप्त गरेका छन् ।
मुटुरोगको समयमै पहिचान, रोकथाम तथा मुटुको स्वास्थ्यसम्बन्धी जनचेतना अभिवृद्धि गर्ने उद्देश्यले शिविर आयोजना गरिएको हो ।
नेशनल मेडिकल कलेज तथा शिक्षण अस्पताल, नेशनल हार्ट एन्ड लङ सोसाइटी नेपाल र चेक हार्ट फाउन्डेसनको संयुक्त सहकार्यमा आयोजित शिविरमा नेशनल मेडिकल कलेजका वरिष्ठ मुटुरोग विशेषज्ञ डा. अच्युतानन्द लाल कर्णले सहभागीहरूको स्वास्थ्य परीक्षण गर्नुका साथै आवश्यक परामर्श प्रदान गरेका थिए ।
शिविरमा मुटुरोगसम्बन्धी विशेषज्ञ परामर्शका साथै इकोकार्डियोग्राफी (इको), इलेक्ट्रोकार्डियोग्राम (ईसीजी), मधुमेह तथा उच्च रक्तचापको निःशुल्क परीक्षण सेवा उपलब्ध गराइएको थियो ।
विशेषज्ञ स्वास्थ्य सेवाको पहुँचबाट टाढा रहेका स्थानीय नागरिकलाई आफ्नै क्षेत्रमा मुटुरोगसम्बन्धी परीक्षण तथा परामर्श सेवा उपलब्ध गराउने उद्देश्यले शिविर सञ्चालन गरिएको आयोजकले जनाएको छ ।
गाउँ तथा बस्तीस्तरसम्म गुणस्तरीय स्वास्थ्य सेवाको पहुँच विस्तार गर्ने उद्देश्यसहित नेशनल मेडिकल कलेजले विभिन्न स्थानमा स्वास्थ्य शिविर तथा जनचेतनामूलक कार्यक्रम सञ्चालन गर्दै आएको छ । आगामी दिनमा पनि यस्ता कार्यक्रमलाई निरन्तरता दिने आयोजकले जनाएको छ ।
