वीरगञ्ज । वीरगञ्जमा पार्किङ गरी राखिएको मोटरसाइकलको लक तोडी चोरी गरेर भाग्दै गरेका एक युवकलाई प्रहरीले मोटरसाइकलसहित पक्राउ गरेको छ ।
पर्साको वीरगञ्ज महानगरपालिका–१६ स्थित लिंकरोड सडकखण्डबाट चोरी भएको मोटरसाइकलसहित बाराको निजगढ नगरपालिका–११ का २७ वर्षीय राकेश चौधरीलाई प्रहरीले नियन्त्रणमा लिएको हो ।
प्रहरीका अनुसार वीरगञ्ज महानगरपालिका–२४ रामगढवाका ३० वर्षीय विकासकुमार कुशवाहाको नाममा दर्ता रहेको मधेस प्रदेश ०३–०३५ प ७१७५ नम्बरको रातो–कालो रङको २२० सीसीको पल्सर मोटरसाइकल सोमबार बिहान करिब ९ः३० बजे चोरी भएको थियो ।
पार्किङ गरी राखिएको अवस्थामा मोटरसाइकलको लक तोडी चोरी गरिएको सूचना प्राप्त हुनासाथ वडा प्रहरी कार्यालय विर्ताबाट खटिएको प्रहरी टोलीले खोजतलास सुरु गरेको थियो । सोही क्रममा लिंकरोडबाटै चोरी भएको मोटरसाइकलसहित चौधरीलाई पक्राउ गर्न प्रहरी सफल भएको हो ।
पक्राउ परेका चौधरीलाई प्रहरी हिरासतमा राखिएको छ । घटनाबारे चोरी कसुरसम्बन्धी थप अनुसन्धान भइरहेको प्रहरीले जनाएको छ ।
