बारा । बाराको प्रसौनी गाउँपालिकामा निर्माण सम्पन्न भएको १० शय्याको प्राथमिक अस्पताल औपचारिक रूपमा उद्घाटन गरिएको छ।
प्रसौनी स्वास्थ्य चौकी परिसरमा आयोजित एक समारोहबीच नवनिर्मित अस्पतालको उद्घाटन गरिएको हो। अस्पताल निर्माणमा कुल ७ करोड ४७ लाख रुपैयाँ खर्च भएको जनाइएको छ।
कार्यक्रमको अध्यक्षता वडा नं. १ का अध्यक्ष लालबाबु मुखियाले गरेका थिए भने प्रमुख अतिथिका रूपमा विनोद प्रसाद जसवाल सहभागी थिए।
कार्यक्रममा वडा नं. २ का अध्यक्ष हृदय साह, वडा नं. ३ का अध्यक्ष छोटेलाल साह, वडा नं. ७ का अध्यक्ष इस्लाम मियाँ तथा गाउँपालिकाका प्रशासकीय अधिकृत पवन केसरीलगायत जनप्रतिनिधि, कार्यपालिका सदस्य, वडा सदस्य र स्थानीय बासिन्दाको उपस्थिति थियो।
१० शय्याको अस्पताल सञ्चालनमा आएसँगै प्रसौनी गाउँपालिका तथा आसपासका क्षेत्रका बासिन्दाले स्थानीय स्तरमै स्वास्थ्य सेवा प्राप्त गर्न सहज हुने अपेक्षा गरिएको छ। अस्पताल सञ्चालनले सामान्य उपचारका लागि अन्यत्र जानुपर्ने बाध्यता कम गर्नुका साथै स्थानीय स्वास्थ्य सेवाको पहुँच विस्तारमा सहयोग पुग्ने विश्वास लिइएको छ।
