वीरगञ्ज । विश्व हिन्दू परिषद् नेपालको आयोजनामा यस वर्ष पनि वीरगंजमा गहवामाई चुनरी यात्रा भव्य रूपमा सम्पन्न भएको छ । बडादशैंको पहिलो दिन घटस्थापनाको अवसरमा आइतबार निकालिएको दोस्रो चुनरी यात्रामा करिब १० हजार महिला तथा भक्तजन सहभागी भएको आयोजकले जनाएको छ ।
वीरगंजकाे माइस्थानस्थित गहवामाई मन्दिर परिसरबाट बाजागाजा र धार्मिक उत्साहका साथ सुरु भएको चुनरी यात्रामा देवीका विभिन्न स्वरूप झल्काउने आकर्षक झाँकीसमेत प्रदर्शन गरिएको थियो । यात्रामा सहभागी महिला तथा भक्तजनले धार्मिक आस्थासहित उत्साहपूर्वक सहभागिता जनाएका थिए ।
गत वर्षदेखि सुरु गरिएको चुनरी यात्रालाई यस वर्ष थप भव्य र व्यवस्थित रूपमा आयोजना गरिएको आयोजकले जनाएको छ । यात्राका क्रममा सहभागी भक्तजनको सुरक्षा तथा व्यवस्थापनका लागि परिषद्का स्वयंसेवक, स्थानीय प्रशासन र विभिन्न संघसंस्थासँग समन्वय गरिएको थियो ।
धार्मिक आस्था, परम्परा र संस्कृतिको संरक्षण गर्दै वीरगंजकाे धार्मिक पहिचानलाई थप सुदृढ बनाउने उद्देश्यले चुनरी यात्रालाई निरन्तरता दिइएको विश्व हिन्दू परिषद् नेपालले जनाएको छ ।
