वीरगञ्ज । पर्साको सखुवा प्रसौनी गाउँपालिका–२ पञ्चगावास्थित पार्कमा आयोजित एकदिने रक्तदान कार्यक्रममा दुई महिलासहित २५ जनाले रक्तदान गरेका छन्।
नारायणी खबर मिडिया सखुवा प्रसौनीको आयोजना तथा सखुवा प्रसौनी गाउँपालिकाको समन्वय र सहयोगमा कार्यक्रम सम्पन्न भएको हो। रक्तसञ्चार केन्द्र पर्साको प्राविधिक सहयोगमा आयोजित कार्यक्रम नारायणी खबरका सम्पादक चिरञ्जीवी यादवको अध्यक्षतामा सम्पन्न भएको थियो। कार्यक्रममा गाउँपालिका अध्यक्ष जसवन्त यादव प्रमुख अतिथिका रूपमा सहभागी थिए।
कार्यक्रममा वडा अध्यक्ष चिरञ्जीवी महतो थारु, एम. आरफ अन्सारी, गाउँपालिकाका प्रमुख प्रशासकीय अधिकृत रामबाबु कुशवाहा, लेखा शाखा प्रमुख सुमन साह, प्रशासन शाखा प्रमुख अरविन्द ठाकुर तथा स्वास्थ्य शाखा प्रमुख राजेश रौनियारलगायतको उपस्थिति रहेको थियो।
रक्तदान गर्नेहरूमा कमलेश गुप्ता, सन्दीप महतो, शम्भु सहनी, नवलकिशोर महतो, दीपक तिमल्सिना, राजन खड्का, मुकेश चौधरी, सलवन्ती कुमारी, मोतीराम महतो र राकेश सहनीलगायत रहेका थिए।
रक्तसञ्चार केन्द्र पर्साका प्राविधिक मनिष साहले रक्तदान कार्यक्रमले स्थानीयस्तरमा रगतको अभाव कम गर्न सहयोग पुग्ने विश्वास व्यक्त गरे। उनले नियमित रूपमा आयोजना हुने यस्ता कार्यक्रमबाट संकलित रगत आवश्यक परेका बिरामीसम्म पुर्याउन सहज हुने बताए।
उनले स्थानीयस्तरमा रक्तदानप्रति जनचेतना अभिवृद्धि गर्दै यस्ता मानवीय सेवाका कार्यक्रमलाई निरन्तरता दिनुपर्नेमा जोड दिए।
