वीरगञ्ज । मुआब्जा माग गर्दै वीरगञ्ज महानगरपालिका–२५ श्रीसियाका स्थानीयवासीले श्रीसिया सुक्खा बन्दरगाह ९ड्राइपोर्ट०को मूलगेटमा आज बिहानदेखि धर्ना दिएका छन्।
स्थानीयवासीले बिहान ७ बजेदेखि त्रिपाल टाँगेर धर्ना सुरु गरेका हुन्। उनीहरूका अनुसार फिल्डबुकमा दर्ता रहेका करिब ८०–९० जनाको जग्गा, घर, अस्पताल, विद्यालयलगायत स्ववासी जग्गा तथा संरचनाको मुआब्जा सरकारले उपलब्ध गराउन ढिलाइ गरेको भन्दै आन्दोलन गर्नुपरेको हो।
सरकारले संरचनाको मुआब्जा उपलब्ध गराउँदा फुसको घरमा एक प्रतिशत, खपडाको घरमा डेढ प्रतिशत र पक्की घरमा दुई प्रतिशत सम्पत्ति कर कट्टा गर्ने निर्णय गरेको भन्दै स्थानीयवासीले त्यसको समेत विरोध गरेका छन्।
मुआब्जाको सम्पूर्ण रकम उपलब्ध गराउनुपर्ने र लिखित सम्झौता भएपछि मात्र धर्ना अन्त्य गर्ने वडा सदस्य तेतरी देवीले बताइन्। सरोकारवाला निकायले माग सम्बोधन नगरे भोलिदेखि ड्राइपोर्ट सडकमा नै त्रिपाल टाँगेर पशुचौपाया बाँध्ने, खाना पकाउने र सडकमा नै दैनिक जीवन बिताउने चेतावनी उनले दिइन्।
यसअघि जिल्ला प्रशासन कार्यालय, पर्साका सहायक प्रमुख जिल्ला अधिकारीको नेतृत्वमा मुआब्जा निर्धारणका लागि मूल्याङ्कन समिति गठन गर्ने निर्णय भएको थियो। समितिले संरचनाको मूल्याङ्कन गरी मुआब्जा रकम मागका लागि अर्थ मन्त्रालयमा पठाउने र अर्थ मन्त्रालयबाट रकम प्राप्त भएपछि मात्र स्थानीयवासीलाई मुआब्जा वितरण गर्न सकिने प्रशासनले जनाएको छ।
