वीरगञ्ज । एक वर्षदेखि परिवारको सम्पर्कबाट टाढा रहेकी भारतकी एक महिलाको मानवसेवा आश्रम वीरगञ्जको पहलमा पारिवारिक पुनर्मिलन भएको छ।
इलाका प्रहरी कार्यालय प्रसौनी, बाराले उद्धार गरी असोज ७ गते राति करिब १० बजे मानवसेवा आश्रम वीरगञ्जमा ल्याएकी महिलाको परिवार पहिचान भएपछि बिहीबार उनका भाइ सोहन रायको जिम्मा लगाइएको हो।
आश्रमका अनुसार ती महिला भारतको मोतिहारी जिल्ला, राजेपुर थाना, मोहम्मदपुर सागर गाउँकी हुन्। उनी करिब एक वर्षदेखि परिवारसँग सम्पर्कविहीन थिइन्।
महिलाको परिवार पहिचानका लागि आश्रमले निरन्तर खोजी तथा विभिन्न पक्षसँग समन्वय गरेको थियो। सोही क्रममा परिवारसँग सम्पर्क स्थापित भएपछि उनलाई भाइ रायको जिम्मा लगाएर पुनर्मिलन गराइएको आश्रमका संस्थापक अभियन्ता देवेश गुप्ताले जानकारी दिनुभयो।
उहाँका अनुसार परिवारबाट टाढा रहेकी महिलालाई आफन्तसँग पुनः जोड्न सक्नु आश्रमको सेवाकार्यको महत्वपूर्ण उपलब्धि हो।
आश्रमले उद्धार तथा परिवार खोजीमा सहयोग गर्ने इलाका प्रहरी कार्यालय प्रसौनी, सामाजिक अभियन्ता विनय कुमारलगायत सबैप्रति आभार व्यक्त गरेको छ। मानवसेवा आश्रमले सडक तथा सार्वजनिक स्थानमा अलपत्र अवस्थामा भेटिएका व्यक्तिको उद्धार, संरक्षण र परिवार पहिचान गरी पुनर्मिलन गराउँदै आएको जनाएको छ।
