वीरगञ्ज । प्रतिनिधिसभा सदस्य बुद्धिप्रसाद (हरि) पन्तले हिमाल आइरन एन्ड स्टिल उद्योगका सयौँ श्रमिकले नौ महिनादेखि पारिश्रमिक नपाएको भन्दै सरकारको ध्यानाकर्षण गराएका छन्।
पर्सा क्षेत्र नं। १ का सांसद तथा राष्ट्रिय स्वतन्त्र पार्टीका सभापति पन्तले बुधबार प्रतिनिधिसभाको बैठकमा सभामुखमार्फत सरकारको ध्यानाकर्षण गराउँदै दसैँको मुखमा श्रमिकको पारिश्रमिक यथाशीघ्र भुक्तानीका लागि आवश्यक समन्वय र सहजीकरण गर्न आग्रह गरे।
उनका अनुसार उद्योगका श्रमिकले करिब अढाई करोड रुपैयाँभन्दा बढी पारिश्रमिक पाउन बाँकी रहेको छ। लामो समयदेखि तलब नपाउँदा श्रमिक तथा उनीहरूका परिवार आर्थिक समस्यामा परेको भन्दै उनले तत्काल समस्या समाधान गर्न सरकारसँग आग्रह गरेका हुन्।
पन्तले कुनै समय हजारौँ श्रमिकलाई रोजगारी दिएको ज्योति समूहअन्तर्गतको उक्त उद्योग अहिले करिब १५० जना श्रमिकलाई समेत पारिश्रमिक दिन नसक्ने अवस्थामा पुग्नुको कारणबारे समेत सरकारसँग प्रश्न गरेका छन्।
उनले पछिल्ला सरकारका आर्थिक तथा बैंकिङ लगानी नीतिका कारण उत्पन्न औद्योगिक संकटको गम्भीर समीक्षा गर्नुपर्ने बताए। संकटग्रस्त उद्योगलाई पुनः सञ्चालनमा ल्याउन विशेष आर्थिक नीति अवलम्बन गर्दै उद्योग र रोजगारी संरक्षणमार्फत अर्थतन्त्र चलायमान बनाउन सरकारको ध्यान जानुपर्नेमा उनले जोड दिए।
