वीरगञ्ज । जिल्ला प्रहरी कार्यालय पर्सामा प्रभु हस्पिटल वीरगञ्जले बुधबार महिला स्वास्थ्यसम्बन्धी निःशुल्क स्वास्थ्य शिविर सञ्चालन गरेको छ।
शिविरमा जिल्ला प्रहरी कार्यालयमा कार्यरत महिला प्रहरी तथा थुनुवाको निःशुल्क स्वास्थ्य परीक्षण गर्नुका साथै महिला स्वास्थ्यसम्बन्धी अन्तरक्रिया तथा परामर्श प्रदान गरिएको थियो।
प्रभु हस्पिटलकी वरिष्ठ स्त्रीरोग विशेषज्ञ डा. लक्ष्मी थापा गुप्ताले करिब ४० जना महिला प्रहरी र एक जना महिला थुनुवाको स्वास्थ्य परीक्षण गरेकी थिइन्। शिविरमा पाठेघर तथा सर्भाइकल क्यान्सरलगायत महिलामा देखिने विभिन्न स्वास्थ्य समस्याको परीक्षण गरिएको थियो।
सहभागीलाई स्वास्थ्य समस्याबारे आवश्यक परामर्श दिनुका साथै आवश्यक औषधि वितरण र उपचारका लागि सुझावसमेत दिइएको थियो।
कार्यक्रमका प्रमुख अतिथि जिल्ला प्रहरी कार्यालय पर्साका प्रहरी उपरीक्षक पवनकुमार भट्टराईले महिलाले आफ्नो स्वास्थ्यप्रति सचेत रहनुपर्ने भएकाले स्वास्थ्य शिविर आयोजना गरिएको बताए।
कार्यक्रममा संयोजक दिलिपराज कार्की, प्रहरी नायब उपरीक्षकद्वय चक्रबहादुर मल्ल र राजु कार्की, प्रभु हस्पिटलकी नर्सिङ निर्देशक सरिता सिंह, प्राविधिक सन्जित साह, फर्मासिस्ट मिखा श्रेष्ठ, प्रहरी निरीक्षक सोनी निम्हाफुकीलगायतको सहभागिता थियो।
