वीरगञ्ज । वीरगञ्ज महानगरपालिकाका वडा नम्बर १७, २५ र २६ अन्तर्गतका अठराहा, सुगौली, बहुअरी, अलौललगायत क्षेत्रको चार वर्षदेखि अवरुद्ध पानी निकास खुलाइएको छ।
स्थानीयवासीले विरोध गरेपछि महानगरपालिकाले डोजर प्रयोग गरी नाला निर्माण तथा सफाइ गर्दै लामो समयदेखि अवरुद्ध पानीको निकास खुलाएको हो।
पानीको सहज निकास नहुँदा वर्षायाममा वडा नम्बर १७, २५ र २६ का अठराहा, सुगौली, अलौललगायत आसपासका बस्ती तथा ठूलो क्षेत्र डुबानमा पर्दै आएको थियो। लामो समयसम्म पानी जमिरहँदा स्थानीयलाई आवतजावतमा समस्या हुनुका साथै खेतीपातीसमेत प्रभावित हुँदै आएको थियो।
बस्ती तथा आसपासका क्षेत्रमा लामो समय पानी जम्दा लामखुट्टेको प्रकोप बढ्ने, दुर्गन्ध फैलिने तथा विभिन्न स्वास्थ्य समस्या निम्तिने गरेको स्थानीयको गुनासो थियो। जलजमावका कारण दैनिक जनजीवन प्रभावित हुनुका साथै खेतीयोग्य जमिनसमेत प्रयोग गर्न कठिन हुँदै आएको थियो।
लामो समयदेखि अवरुद्ध पानी निकास खुलाउन थालिएपछि अठराहा, सुगौली, अलौललगायत आसपासका क्षेत्रका स्थानीयवासीले वर्षायाममा हुने डुबान तथा जलजमावको समस्या कम हुने अपेक्षा गरेका छन्।
महानगरपालिकाका अनुसार अवरुद्ध पानी निकासलाई पूर्ण रूपमा खुलाएर वर्षाको पानी सहज रूपमा निकास हुने व्यवस्था मिलाइएको छ। नियमित रूपमा पानीको निकास हुन थालेपछि बस्ती तथा खेतीयोग्य जमिनमा हुने डुबानसँगै जलजमावका कारण उत्पन्न हुने लामखुट्टे र दुर्गन्धको समस्या पनि न्यूनीकरण हुने अपेक्षा गरिएको छ।
