वीरगञ्ज । वीरगञ्ज महानगरपालिका–२५ श्रीसियाका स्थानीयवासीले ड्राइपोर्ट निर्माणका क्रममा अधिग्रहण गरिएको जग्गा तथा त्यसमा रहेका भौतिक संरचनाको बाँकी मुआब्जा र क्षतिपूर्ति तत्काल उपलब्ध गराउन माग गरेका छन्।
लामो समयदेखि मुआब्जा प्रक्रिया टुंगोमा पुग्न नसक्दा प्रभावित जग्गाधनी आर्थिक तथा सामाजिक समस्यामा परेको भन्दै स्थानीयवासीले समस्या तत्काल समाधान गर्न सम्बन्धित निकायसँग आग्रह गरेका छन्।
मुआब्जा संघर्ष समिति वीरगञ्ज–२५ श्रीसियाका अध्यक्ष अशोककुमार चौधरीको हस्ताक्षरमा स्थानीयवासीले वीरगञ्ज भन्सारका प्रमुख भन्सार प्रशासक कृष्ण मैनालीलाई ज्ञापनपत्र बुझाउँदै वर्षौँदेखि रोकिएको मुआब्जा प्रक्रिया शीघ्र टुंग्याउन माग गरेका हुन्।
ज्ञापनपत्रमा करिब दुई दशकअघि ड्राइपोर्ट निर्माणका लागि अधिग्रहण गरिएको जग्गाको मुआब्जा प्रक्रिया अझै पूर्ण रूपमा सम्पन्न हुन नसकेको उल्लेख गरिएको छ। संघर्ष समितिका अनुसार २०६१ सालदेखि जग्गा अधिग्रहण प्रक्रिया अघि बढाइए पनि कतिपय जग्गाधनीले हालसम्म आफ्नो जग्गाको पूर्ण मुआब्जा पाउन सकेका छैनन्।
स्थानीयवासीका अनुसार नापजाँचका क्रममा नक्सा तथा फिल्डबुकमा देखिएका त्रुटिका कारण वास्तविक जग्गाधनीको नाममा मुआब्जा निर्धारण तथा वितरण गर्न समस्या भएको हो।
उनीहरूले अभिलेखमा देखिएका त्रुटि सच्याएर वास्तविक जग्गाधनीको पहिचान गरी बाँकी मुआब्जा तथा क्षतिपूर्ति उपलब्ध गराउन माग गरेका छन्।
स्थानीयवासीले लामो समयदेखि रोकिएको मुआब्जा प्रक्रिया तत्काल टुंग्याउन र प्रभावित परिवारले पाउनुपर्ने रकम शीघ्र उपलब्ध गराउन सम्बन्धित निकायको ध्यानाकर्षण गराएका छन्।
