बारा । बाराको सिम्रौनगढबाट सशस्त्र प्रहरीले दुई थान कटुवा पेस्तोल र ५ राउन्ड गोलीसहित एक जनालाई पक्राउ गरेको छ।
पक्राउ पर्नेमा सिम्रौनगढ नगरपालिका–२ अमृतगञ्जका अन्दाजी ५० वर्षीय जयप्रकाश प्रसाद कुशवाहा रहेका छन्।
सशस्त्र प्रहरी बल नेपाल इन्टेलिजेन्स ब्युरोबाट प्राप्त विशेष सूचनाका आधारमा सशस्त्र प्रहरी बोर्डर आउट पोस्ट गोलागञ्जबाट खटिएको टोलीले सोमबार सिम्रौनगढ नगरपालिका–६, सलेमपुरबाट कुशवाहालाई पक्राउ गरेको हो।
सशस्त्र प्रहरीका अनुसार कुशवाहाको साथबाट दुई थान कटुवा पेस्तोल, ५ राउन्ड गोली र एक थान मोबाइल बरामद गरिएको छ।
सशस्त्र प्रहरी बल नेपाल नम्बर १२ गण हेडक्वार्टर बाराका सूचना अधिकारी एवं सशस्त्र प्रहरी नायब उपरीक्षक विक्रममणि अधिकारीले बरामद सामग्रीसहित कुशवाहालाई नियन्त्रणमा लिइएको जानकारी दिए।
पेस्तोल तथा गोलीसहित पक्राउ परेका कुशवाहालाई आवश्यक अनुसन्धान तथा कारबाहीका लागि इलाका प्रहरी कार्यालय सिम्रौनगढमा बुझाइएको सशस्त्र प्रहरीले जनाएको छ।
