सेढवा । पर्साको जिराभवानी गाउँपालिका–३ स्थित कृषि तथा पशुपन्छी भवनमा स्थानीय तह र विद्यालयबीच अनुभव तथा सिकाइ आदान–प्रदान कार्यक्रम सम्पन्न भएको छ ।
नेपाल अपाङ्ग महिला संघको आयोजनामा भएको कार्यक्रममा स्थानीय तह, विद्यालय तथा सरोकारवाला निकायका प्रतिनिधिहरूको सहभागिता रहेको थियो । कार्यक्रममा वडा नं. १ का वडाध्यक्ष रामशरण ख्वास, शिक्षा अधिकृत शिवराज फ्यूयाल, जिल्ला अपाङ्गता अधिकार केन्द्र (DDRC) का रामाकान्त प्रसाद कुर्मी, प्रधानाध्यापक रामाशंकर चौधरी, खेमराज महतो, कृपासिन्धु पटवारी, विभिन्न विद्यालयका शिक्षक तथा बाल क्लबका प्रमुखहरूको उपस्थिति रहेको थियो ।
कार्यक्रममा ACCESS कार्यक्रमका प्रमुख उपलब्धि तथा प्रमाणमा आधारित परिवर्तन, विद्यमान चुनौती तथा ग्याप, सिकाइ र आगामी सिफारिसका विषयमा छलफल गरिएको थियो । साथै विद्यालय तथा स्थानीय तहमा भएका असल अभ्यासहरू आदान–प्रदान गर्दै पहिचान भएका समस्या र चुनौतीहरूको समाधानका उपायहरूबारे सहभागीहरूले आफ्ना अनुभव प्रस्तुत गरेका थिए ।
सहभागीहरूले अपाङ्गता भएका बालबालिका तथा विद्यार्थीहरूको शिक्षा, पहुँच र सहभागिता थप प्रभावकारी बनाउन स्थानीय तह, विद्यालय, शिक्षक, बाल क्लब तथा सरोकारवाला निकायबीच निरन्तर समन्वय र सहकार्य आवश्यक रहेकोमा जोड दिएका थिए । कार्यक्रमको सहजीकरण गुलसन कुमार त्रिपाठीले गरेका थिए ।
