काठमाडौं । आगामी शुक्रबारदेखि आइतबारसम्म देशका धेरै ठाउँमा ठूलो वर्षाको सम्भावना रहेको मौसम पूर्वानुमान महाशाखाले जनाएको छ।
महाशाखाले विशेष मौसम बुलेटिन जारी गर्दै केही स्थानमा मेघगर्जन, चट्याङ र हावाहुरीसहित भारीदेखि अति भारी वर्षा हुन सक्ने जनाएको हो।
गण्डकी र लुम्बिनी प्रदेशका केही स्थान तथा मधेश, कोशी, बागमती, कर्णाली र सुदूरपश्चिम प्रदेशका थोरै स्थानमा भारीदेखि धेरै भारी वर्षाको सम्भावना रहेको महाशाखाले जनाएको छ।
उत्तर अण्डमान सागर तथा आसपास बनेको न्यून चापीय क्षेत्र अहिले बंगालको खाडीको मध्य भागमा पुगेको छ। उक्त प्रणाली थप शक्तिशाली हुँदै गहिरो न्यून चापीय क्षेत्रमा परिणत हुने क्रममा पश्चिम–उत्तरपश्चिम दिशातर्फ अघि बढिरहेको महाशाखाले जनाएको छ।
यसको प्रभावका कारण बुधबारदेखि नै कोशी, मधेश, बागमती र गण्डकी प्रदेशका विभिन्न स्थानमा वर्षा हुन सक्ने अनुमान गरिएको छ।
सम्भावित भारी वर्षाका कारण बाढी, पहिरो, भूक्षय तथा तराई र शहरी क्षेत्रमा डुबानको जोखिम बढ्न सक्ने भएकाले महाशाखाले सतर्कता अपनाउन आग्रह गरेको छ।
भारी वर्षाका कारण नदी, खोला तथा नालामा पानीको बहाव बढ्न सक्ने भएकाले दैनिक जनजीवन, कृषि, स्वास्थ्य, पर्यटन, सडक तथा हवाई यातायातसमेत प्रभावित हुन सक्ने जनाइएको छ।
यस्तै, हिमाली क्षेत्रमा भारी हिमपातको सम्भावना रहेकाले पर्वतारोही तथा सम्बन्धित सबैलाई आवश्यक सावधानी अपनाउन मौसम पूर्वानुमान महाशाखाले अनुरोध गरेको छ।
