लहान । लहान नगरपालिका–१४ स्थित श्री जनता माध्यमिक विद्यालय बस्तीपुरमा पछिल्लो समय शैक्षिक तथा भौतिक सुधारको अपेक्षा बढेको छ। लामो इतिहास बोकेको विद्यालयमा शिक्षा मन्त्री सस्मित पोखरेलले स्थलगत निरीक्षण गरेपछि विद्यालयको पुरानो शैक्षिक पहिचान पुनःस्थापित हुने आशा स्थानीय, अभिभावक तथा विद्यालय परिवारमा जागेको हो।
विसं २००४ सालमा स्थापना भएको यस विद्यालय कुनै समय सिरहा जिल्लाकै प्रतिष्ठित शैक्षिक संस्थाका रूपमा परिचित थियो। तीन दशकअघिसम्म यहाँ तीन हजारभन्दा बढी विद्यार्थी अध्ययन गर्ने गरेकोमा अहिले विद्यार्थी संख्या घटेर ८०२ मा सीमित भएको विद्यालयले जनाएको छ।
लहान नगरपालिका–१४ का वडाध्यक्ष धनिकलाल यादवका अनुसार पछिल्लो समय निजी विद्यालयप्रतिको आकर्षण र अंग्रेजी माध्यममा पढाउने प्रवृत्ति बढेसँगै सामुदायिक विद्यालयमा विद्यार्थीको संख्या घटेको हो। विद्यालयले पनि विद्यार्थी आकर्षित गर्न अंग्रेजी माध्यमबाट पठनपाठन सुरु गरेको छ।
सिरहा–१ का सांसद बब्लु गुप्ताको पहलमा गत भदौ २७ गते शिक्षा मन्त्री पोखरेलले विद्यालयको निरीक्षण गर्नुभएको थियो। निरीक्षणका क्रममा मन्त्री पोखरेलले विद्यालयलाई जस्तापातामुक्त बनाउँदै आधुनिक प्रविधिसहितको शैक्षिक वातावरण निर्माणमा सहयोग गर्ने प्रतिबद्धता जनाउनुभएको विद्यालय पक्षले जनाएको छ।
विद्यालय व्यवस्थापन समितिका अध्यक्ष अरुण यादवका अनुसार मन्त्रीको निरीक्षण र सुधारका लागि व्यक्त प्रतिबद्धताले विद्यालयको अवस्थामा परिवर्तन आउने अपेक्षा बढाएको छ।
“विद्यालयको पुरानो गौरव फर्काउन भौतिक पूर्वाधारसँगै शिक्षाको गुणस्तर सुधार आवश्यक छ,” यादवले भन्नुभयो, “मन्त्रीको निरीक्षणपछि विद्यालय विकासका लागि नयाँ आशा पलाएको छ।”
करिब आठ दशक पुरानो विद्यालय भवन जीर्ण बन्दै गएकाले नयाँ तथा सुविधासम्पन्न भवन निर्माण गर्नुपर्ने आवश्यकता रहेको विद्यालय व्यवस्थापन समितिले जनाएको छ। लहान नगरपालिकाले विद्यालयको शैक्षिक अवस्था सुधारका लागि अंग्रेजी माध्यममा कक्षा सञ्चालनमा सहयोग गरे पनि भौतिक संरचनाको सुधार अझै चुनौतीका रूपमा रहेको अध्यक्ष यादवको भनाइ छ।
विद्यालयको इतिहास स्थानीय समुदायसँग पनि जोडिएको छ। नेपाली कांग्रेसका नेता स्वर्गीय प्रदीप गिरिका पिता मित्रलाल गिरी तथा पण्डित विश्वरञ्जन बारालले विद्यालय स्थापनामा भूमिका निर्वाह गरेको स्थानीयको भनाइ छ। विगतमा पहाडे समुदायको सक्रिय सहभागिता र संरक्षणका कारण विद्यालयले शैक्षिक क्षेत्रमा राम्रो पहिचान बनाएको बताइन्छ।
तर समयक्रममा बस्तीपुरबाट पहाडे समुदायका धेरै परिवार अन्यत्र बसाइँ सर्नु तथा निजी विद्यालयप्रतिको आकर्षण बढ्नुले विद्यालयको विद्यार्थी संख्या घट्दै गएको स्थानीय जोगी यादवले बताउनुभयो।
उहाँका अनुसार विद्यालयको पुरानो शैक्षिक वातावरण कायम गर्न समुदाय, स्थानीय सरकार र विद्यालय प्रशासनबीच थप सहकार्य आवश्यक छ।
स्थानीय मानव अधिकारकर्मी राजकुमार राउतले शिक्षा मन्त्रीको स्थलगत अनुगमन र सांसदको पहलले विद्यालय सुधारको वातावरण तयार भएको बताउनुभयो। उहाँले विद्यालयको भौतिक पूर्वाधारसँगै गुणस्तरीय शिक्षामा पनि ध्यान दिनुपर्ने आवश्यकता औँल्याउनुभयो।
विद्यालयका प्रधानाध्यापक शोभानन्द चौधरीले पनि मन्त्रीको प्रतिबद्धताले विद्यालय परिवारमा उत्साह थपिएको बताउनुभयो। उहाँका अनुसार विद्यालयको शैक्षिक गुणस्तर वृद्धि, आधुनिक प्रविधिको प्रयोग र भौतिक संरचना सुधार गर्न सके विद्यार्थी तथा अभिभावकको विश्वास पुनः बढाउन सकिनेछ।
विद्यालयको पुरानो साख फर्काउन अब प्रतिबद्धता कार्यान्वयनलाई मुख्य विषय मानिएको छ। भवन निर्माण, प्रविधिमैत्री कक्षा, गुणस्तरीय शिक्षण, अंग्रेजी माध्यमको प्रभावकारी सञ्चालन तथा विद्यार्थीमैत्री वातावरण निर्माण गर्न सके बस्तीपुर माविले आफ्नो पुरानो पहिचान पुनः कायम गर्न सक्ने अपेक्षा गरिएको छ।
