जनकपुरधाम । जनकपुरधाम उपमहानगरपालिका–८ रामानन्द चोकस्थित एक घरमा आगलागी हुँदा एक वृद्धको जलेर मृत्यु भएको छ।
जिल्ला प्रहरी कार्यालयका प्रवक्ता ओमप्रकाश खनालका अनुसार आगलागीमा महोत्तरीको लोहारपट्टी नगरपालिका–२ का ७० वर्षीय किशोरी सहनीको मृत्यु भएको हो।
आगलागीबाट घरायसी सामानसहित करिब तीन लाख रुपैयाँ बराबरको क्षति भएको प्रहरीले जनाएको छ। गएराति भएको आगलागी विद्युत् सर्ट भएर लागेको हुनसक्ने प्रहरीको प्रारम्भिक अनुमान छ।
स्थानीय तहको वारुणयन्त्र, प्रहरी र स्थानीयवासीको सहयोगमा आगो नियन्त्रणमा लिइएको थियो। घटनाबारे थप अनुसन्धान भइरहेको प्रहरीले जनाएको छ।
