वीरगंज । पछिल्लो समय सर्पदंशका घटना बढ्दै गएसँगै वीरगञ्जस्थित नारायणी अस्पतालमा सर्पले टोकेका दुई महिला भेन्टिलेटरमा उपचाररत रहेका छन्।
अस्पतालका अनुसार रौतहटको लौकाहा पोखरियाकी १७ वर्षीया किरण कुमारी र बाराको विश्रामपुर गाउँपालिकाकी ३५ वर्षीया रिना देवी सर्पदंशपछि गम्भीर अवस्थामा उपचाररत छन्। दुवै जनाको उपचार नारायणी अस्पतालका मेडिकल अफिसर डा। दीपक चौरसियाको समूहले गरिरहेको छ।
चिकित्सकका अनुसार सर्पदंशबाट बच्न राति तथा खेतबारीमा हिँड्दा टर्च वा बत्तीको प्रयोग गर्ने, जुत्ता लगाउने तथा घरवरपर झाडी र फोहोर नराख्ने जस्ता सावधानी अपनाउन आवश्यक छ।
सर्पले टोकेमा घाउ चिर्ने, विष चुस्ने, कडा गरी बाँध्ने वा घरेलु उपचार गर्ने जस्ता कार्य नगरी तत्काल नजिकको स्वास्थ्य संस्थामा पुर्याउन चिकित्सकले सुझाव दिएका छन्।
समयमै उचित उपचार पाएमा सर्पदंशबाट ज्यान जोगाउन सकिने भएकाले सर्पले टोकेको शंका लाग्नेबित्तिकै ढिला नगरी अस्पताल लैजान चिकित्सकको आग्रह छ।
