वीरगंज । नयाँ आर्थिक वर्ष सुरु भएको करिब दुई महिना सम्म पनि बाराका अधिकांश स्थानीय तहको खाता सञ्चालन हुन सकेको छैन । जिल्लाका १६ स्थानीय तहमध्ये हालसम्म ६ वटा स्थानीय तहको मात्र खाता सञ्चालनमा आएको छ ।
कोष तथा लेखा नियन्त्रक कार्यालय बाराका प्रमुख कोष नियन्त्रक राधेश्याम गिरीका अनुसार देवताल गाउँपालिका, करैयामाई गाउँपालिका, सिम्रौनगढ नगरपालिका, परवानीपुर गाउँपालिका, प्रसौनी गाउँपालिका र विश्रामपुर गाउँपालिकाको मात्र खाता सञ्चालन भएको हो ।
बारा जिल्लामा दुई उपमहानगरपालिकासहित १६ वटा स्थानीय तह रहेका छन् । तीमध्ये कलैया उपमहानगरपालिकासहित १० वटा स्थानीय तहको खाता सञ्चालन हुन बाँकी रहेको कोष नियन्त्रक गिरीले जानकारी दिए ।
उनका अनुसार कलैया उपमहानगरपालिका, जितपुरसिमरा उपमहानगरपालिका, महागढीमाई नगरपालिका, पचराैता नगरपालिका, काेल्भी नगरपालिका, निजगढ नगरपालिका, फेटा गाउँपालिका, बारागढी गाउँपालिका, आदर्शकाेत्वाल गाउँपालिका र सुवर्ण गाउँपालिकाकाे खाता संचालन हुन सकेकाे छैन् ।
नयाँ आर्थिक वर्ष सुरु भएको दुई महिनासम्म पनि अधिकांश स्थानीय तहको खाता सञ्चालन हुन नसक्दा कर्मचारीको तलब भुक्तानीदेखि विकास निर्माणका कामसमेत प्रभावित भएका छन् । सरकारले कर्मचारीलाई १५ दिनभित्र तलब खुवाउने व्यवस्था गर्ने बताए पनि स्थानीय तहको खाता सञ्चालनमा ढिलाइ हुँदा दुई महिना सम्म पनि कर्मचारीले तलब पाउन सकेका छैनन् ।
यस्तै, पर्साका पनि अधिकांश स्थानीय तहको खाता सञ्चालन हुन सकेको छैन । प्राप्त जानकारीअनुसार वीरगंज महानगरपालिका, पर्सागढी नगरपालिका, जिराभवानी गाउँपालिका, बिन्दवासिनी गाउँपालिका र पटेर्वा सुगौली गाउँपालिकाको मात्र खाता सञ्चालनमा आएको छ ।
यसरी बारा र पर्साका अधिकांश स्थानीय तहको खाता सञ्चालनमा ढिलाइ हुँदा चालु आर्थिक वर्षको बजेट कार्यान्वयन, कर्मचारीको तलब भुक्तानी तथा विकास निर्माणका गतिविधि प्रभावित हुने अवस्था देखिएको छ ।
