वीरगंज । चोरी भएको मोटरसाइकल लिएर भारत पुगेका रौतहटका एक युवकलाई भारतीय प्रहरीले बिहारको मोतीहारी जिल्लाबाट पक्राउ गरेको छ।
पक्राउ पर्नेमा रौतहटको गुजरा नगरपालिका–बलुवा गाउँका २५ वर्षीय शेख कलीमुल्लाह रहेका छन्।
भारत–नेपाल सीमावर्ती क्षेत्रमा सवारीसाधन जाँच गर्ने क्रममा झरोखर थाना प्रहरीले शुक्रबार छितरौली गाउँनजिकबाट कलीमुल्लाहलाई नियन्त्रणमा लिएको हो।
भारतीय प्रहरीका अनुसार नियमित जाँचका क्रममा एचएचडी मेसिनमार्फत मोटरसाइकलको चेसिस नम्बर र दर्ता नम्बर परीक्षण गर्दा दुवै विवरणमा भिन्नता भेटिएको थियो। त्यसपछि प्रहरीले मोटरसाइकलको थप विवरण रेकर्डसँग मिलान गर्दा उक्त मोटरसाइकल चोरीसम्बन्धी घटनामा मुद्दा दर्ता भएको खुलेको थियो।
प्रहरीका अनुसार मुजफ्फरपुरको सदर थाना काण्ड नम्बर ७९१/२१ मा उक्त मोटरसाइकल चोरीसम्बन्धी मुद्दा दर्ता रहेको छ। सवारीसाधनको विवरण सत्यापन गर्दा मोटरसाइकल चोरीको भएको पुष्टि भएपछि कलीमुल्लाहलाई पक्राउ गरिएको प्रहरीले जनाएको छ।
सीमावर्ती क्षेत्रमा चोरीका मोटरसाइकलको नम्बर तथा चेसिस परिवर्तन गरी नेपाल–भारत ओसारपसार हुने गरेको आशंकाबीच पछिल्लो पक्राउलाई प्रहरीले सीमा क्षेत्रमा बढाइएको निगरानीको परिणामका रूपमा लिएको छ।
यद्यपि, पक्राउ परेका कलीमुल्लाह मोटरसाइकल चोरीमा प्रत्यक्ष रूपमा संलग्न थिए वा थिएनन् तथा चोरीको मोटरसाइकल उनीसम्म कसरी पुगेको हो भन्ने विषयमा थप अनुसन्धान भइरहेको भारतीय प्रहरीले जनाएको छ।
पक्राउ परेका कलीमुल्लाहमाथि आवश्यक अनुसन्धान तथा कानुनी प्रक्रिया अघि बढाइएको प्रहरीले जनाएको छ।
