सेढवा । पर्साको जिराभवानी गाउँपालिकाका अध्यक्ष अनोज चौधरीको कार्यकक्षमा लगाइएको ताल्चा आइतबार सर्वपक्षीय संवादपछि खोलिएको छ । गाउँपालिकाका जनप्रतिनिधि, प्रमुख प्रशासकीय अधिकृत, शाखा प्रमुख तथा सर्वसाधारणबीच भएको विस्तृत छलफलपछि नागरिक अगुवा कृष्ण चौधरीले अध्यक्ष चौधरीलाई ताल्चाको साँचो हस्तान्तरण गरेका हुन् ।
अध्यक्ष अनोज चौधरीको अध्यक्षतामा भएको संवादमा वडा नं. ३ बरातमा सञ्चालित लक्ष्मी ह्याचरी सम्बन्धी विवाद प्रमुख एजेन्डाका रूपमा उठेको थियो । स्थानीयले अदालतले ह्याचरी बन्द गर्ने फैसला गरिसक्दा पनि त्यसको कार्यान्वयन किन नभएको भन्दै प्रश्न उठाएका थिए । प्रमुख प्रशासकीय अधिकृत अमित कुमार गिरीले अदालतको फैसला कार्यान्वयन पनि कानुनी प्रक्रिया र अदालतकै संयन्त्रमार्फत हुने स्पष्ट पारे ।
स्थानीयका अनुसार लक्ष्मी ह्याचरीका कारण हरैया, बसन्तपुरलगायतका गाउँमा झिँगाको प्रकोप बढ्नुका साथै वातावरणीय प्रदूषण भएको भन्दै गाउँपालिकाको न्यायिक समितिमा उजुरी परेको थियो । न्यायिक समितिले ह्याचरी बन्द गर्न निर्देशन दिएपछि सञ्चालकले अदालतबाट अन्तरिम आदेश (स्टे अर्डर) ल्याएका थिए । पछि अदालतले गाउँपालिकाकै पक्षमा फैसला गरेको जानकारी बैठकमा दिइएको थियो ।
संवादका क्रममा सर्वसाधारणको मागअनुसार आर्थिक वर्ष २०८२/८३ को रातो किताब प्रमुख प्रशासकीय अधिकृत गिरीले उपलब्ध गराएका थिए । नेपाल सरकारको अनुदानमा वितरण गरिएको रासायनिक मलमा अनियमितता भएको आरोपबारे कृषि सहकारी संस्था तथा मल वितरणको विवरण पनि सार्वजनिक गरिएको थियो । कृषि शाखा प्रमुख रिन्कु चौधरीले सम्बन्धित तथ्याङ्क प्रस्तुत गरेका थिए ।
त्यसैगरी वडा नं. २ मा सञ्चालित आदर्श विद्युत उपभोक्ता समिति सेढवाको साधारणसभा, शिक्षाको गुणस्तर सुधार, उद्योग तथा व्यवसाय दर्ता नीति, ऐतिहासिक जिराभवानी मन्दिरको मेला तथा संरक्षण, बिओपी जिराभवानीको व्यवस्थापन, गाउँपालिकाको प्रशासनिक भवन, कार्यालयमा कर्मचारी तथा जनप्रतिनिधिको नियमित उपस्थिति तथा बालबालिकामा बढ्दो कुलत नियन्त्रणलगायतका विषयमा पनि विस्तृत छलफल भएको थियो ।
कार्यक्रममा जनप्रतिनिधि तथा कर्मचारीहरूले सेवा प्रवाहलाई थप प्रभावकारी बनाउने प्रतिबद्धता जनाएका थिए । नागरिक अगुवा कृष्ण चौधरीले संघीय तथा प्रदेश सरकारबाट प्राप्त अनुदान, गाउँपालिकाको आन्तरिक स्रोत र वार्षिक आय–व्ययको विस्तृत विवरणसमेत सार्वजनिक गर्न माग गरिने बताए ।
गाउँपालिका अध्यक्ष अनोज चौधरीले सूचना माग्नु प्रत्येक नागरिकको वैधानिक अधिकार भएको उल्लेख गर्दै कानुनी प्रक्रियाअनुसार माग गरिएका सूचना यथाशीघ्र उपलब्ध गराउने प्रतिबद्धता व्यक्त गरे ।
कार्यक्रममा उपाध्यक्ष रेखा चौधरी, प्रमुख प्रशासकीय अधिकृत अमित कुमार गिरी, वडाध्यक्ष रामशरण ख्वास, राजेश्वर दास थारु, दारा सिंह राउत थारु, कार्यपालिका सदस्य सरोज चौरसियालगायतले स्थानीयले उठाएका जिज्ञासाको जवाफ दिएका थिए ।
साउन ४ गते स्थानीयवासीले सार्वजनिक संवादको माग गर्दै गाउँपालिकामा निवेदन दर्ता गरेका थिए । सोहीअनुसार साउन १३ गते संवादको मिति तय गरिए पनि अध्यक्ष अनोज चौधरी व्यक्तिगत कारणले उपस्थित हुन नसकेपछि असन्तुष्ट स्थानीयले उनको कार्यकक्षमा ताल्चा लगाएका थिए । आइतबार भएको सर्वपक्षीय संवादपछि उक्त विवाद तत्कालका लागि समाधान भएको छ ।
