सेढवा । पर्साको जिराभवानी गाउँपालिकाका अध्यक्ष अनोज चौधरीको कार्यकक्षमा स्थानीय युवा तथा सर्वसाधारणले ताल्चा लगाएका छन् । गाउँपालिकाभित्रका विभिन्न जनसरोकारका विषयमा खुला संवादका लागि आह्वान गरिए पनि जनप्रतिनिधिहरू उपस्थित नभएपछि आक्रोशित स्थानीयले अध्यक्षको कार्यकक्षमा ताल्चा लगाएका हुन् ।
स्थानीय युवाहरूले गाउँपालिका अध्यक्ष अनोज चौधरी, उपाध्यक्ष रेखा चौधरी, प्रमुख प्रशासकीय अधिकृत अमित कुमार गिरी तथा वडाध्यक्षहरूलाई जनतासँग खुला संवाद गर्न पूर्वनिर्धारित समयमै उपस्थित हुन आग्रह गरेका थिए । तर तोकिएको समयमा अध्यक्ष तथा वडाध्यक्षहरू उपस्थित नभएपछि विरोधस्वरूप कार्यकक्षमा ताल्चा लगाइएको स्थानीयले बताएका छन् ।
स्थानीय युवा कृष्ण चौधरीका अनुसार जनतासँग संवाद कार्यक्रम आयोजना गर्न साउन ४ गते गाउँपालिकामा औपचारिक प्रस्ताव दर्ता गरिएको थियो । सोही प्रस्तावअनुसार साउन १३ गते कार्यक्रम तय गरिएको भए पनि जनप्रतिनिधिहरू अनुपस्थित रहेपछि बाध्य भएर ताल्चा लगाउनुपरेको उनले बताए ।
उनका अनुसार जनप्रतिनिधिहरू जनतासँग प्रत्यक्ष संवादमा नआएसम्म अध्यक्षको कार्यकक्षमा लगाइएको ताल्चा नखोलिने स्थानीयको अडान छ ।
स्थानीयवासीहरूले गाउँपालिकाभित्र विकास निर्माण, शिक्षा, स्वास्थ्य, कृषि, खानेपानी, सडक तथा सामाजिक सुरक्षालगायतका विषयमा थुप्रै गुनासा र जिज्ञासा रहेको जनाउँदै ती विषयमा जनप्रतिनिधिसँग खुला प्रश्नोत्तर तथा छलफल गर्ने उद्देश्यले संवाद कार्यक्रम आयोजना गर्न खोजिएको बताएका छन् ।
यता गाउँपालिकाका प्रमुख प्रशासकीय अधिकृत अमित कुमार गिरीले गाउँपालिकामा दर्ता भएको पत्रअनुसार सबै जनप्रतिनिधिलाई जानकारी गराइएको बताए । उनका अनुसार प्रशासनिक कर्मचारीहरू नियमित रूपमा कार्यालयमा उपस्थित रहे पनि जनप्रतिनिधिलाई कर्मचारीले निर्देशन दिन मिल्ने कानुनी व्यवस्था छैन ।
प्रमुख प्रशासकीय अधिकृत गिरीले गाउँपालिका अध्यक्षको टेलिफोनमार्फत प्राप्त निर्देशनअनुसार आगामी साउन १८ गते सोमबार जनतासँग खुला संवाद कार्यक्रम आयोजना गरिने जानकारी दिएका छन् ।
