सेढवा । राष्ट्रिय स्वतन्त्र पार्टी (रास्वपा) जिराभवानी गाउँपालिका समिति, पर्साले जिराभवानी गाउँपालिकामा रासायनिक मल वितरण प्रक्रियामा अनियमितता भएको आरोप लगाउँदै गाउँपालिकाको ध्यानाकर्षण गराएको छ ।
बुधबार गाउँपालिकाकी उपाध्यक्ष रेखा चौधरी र प्रमुख प्रशासकीय अधिकृत अमित कुमार गिरीमार्फत बुझाइएको ध्यानाकर्षण पत्रमा लामो समयदेखि किसानहरूले रासायनिक मलको अभाव झेल्दै आएको तथा वितरण प्रक्रियामा पारदर्शिताको कमीका कारण वास्तविक कृषकहरू प्रत्यक्ष रूपमा प्रभावित भएको उल्लेख गरिएको छ ।
रास्वपाले सार्वजनिक सूचना समयमै जारी नगरिएको, सीमित व्यक्तिलाई मात्र जानकारी गराएर मल वितरण गरिएको तथा वितरण प्रक्रिया निष्पक्ष नभएको आरोप लगाएको छ । केही स्थानमा जनप्रतिनिधि तथा सम्बन्धित व्यक्तिहरूको प्रभावमा आफ्ना निकटका व्यक्तिहरूलाई आवश्यकताभन्दा बढी मल उपलब्ध गराइएको र वास्तविक किसान भने मलबाट वञ्चित भएको गुनासो आएको पार्टीले जनाएको छ ।
यस्ता गतिविधिले कृषि क्षेत्रको विकास, सुशासन र सार्वजनिक विश्वासमाथि नै प्रश्न उठाएको रास्वपाको भनाइ छ ।
रास्वपा जिराभवानी गाउँपालिका समितिका सभापति रामाकान्त प्रसाद चौधरीद्वारा बुझाइएकाे ध्यानाकर्षण पत्रमार्फत आर्थिक वर्ष २०८२/८३ को आय–व्यय विवरण तथा रातो किताब सार्वजनिक गर्न, चालु आर्थिक वर्ष २०८३/८४ को स्वीकृत बजेट तथा विनियोजित कार्यक्रम गाउँपालिकाको वेबसाइटमार्फत सार्वजनिक गर्न पनि माग गरिएकाे छ ।
यस्तै, मल वितरण प्रक्रियालाई पूर्ण रूपमा पारदर्शी, निष्पक्ष र व्यवस्थित बनाउन, वितरणको मिति, स्थान र परिमाण समयमै सार्वजनिक गर्न तथा वितरणमा देखिएको भनिएको अनियमिततामाथि निष्पक्ष छानबिन गरी दोषीमाथि कारबाही गर्न पनि माग गरिएको छ ।
रास्वपाले किसानलाई सहज रूपमा रासायनिक मल, सिँचाइ तथा आवश्यक कृषि सेवा उपलब्ध गराउन आग्रह गर्दै कृषि उत्पादनको मुख्य समयमा मलको अभावले कृषि उत्पादन, खाद्य सुरक्षा र स्थानीय अर्थतन्त्रमा गम्भीर असर पर्ने भएकाले यस विषयलाई उच्च प्राथमिकताका साथ समाधान गर्न गाउँपालिकासँग अनुरोध गरेको छ ।
साथै, ध्यानाकर्षण पत्र प्राप्त भएको मितिले १५ दिनभित्र आवश्यक कदम तथा भएको प्रगतिबारे लिखित जानकारी उपलब्ध गराउन पनि रास्वपाले माग गरेको छ ।
