वीरगंज । पर्साको सखुवा प्रसौनी गाउँपालिका–१ सिद्धपुरमा गत शुक्रबार मृत अवस्थामा फेला परेकी ३७ वर्षीया लक्ष्मी खड्का सिलवालको मृत्यु शंकास्पद रहेको भन्दै निष्पक्ष छानबिन र दोषीमाथि कडा कारबाहीको माग गर्दै सोमबार वीरगंजमा प्रदर्शन गरिएको छ ।
पर्साकै ठोरी गाउँपालिका–३ रामनगर माइती भएकी दुई सन्तानकी आमा लक्ष्मी आफ्नै घरछेउको गोठमा झुण्डिएको अवस्थामा मृत फेला परेकी थिइन् । तर उनको मृत्यु आत्महत्या नभई हत्या गरेर शव झुण्ड्याइएको माइती पक्षको आरोप छ ।
मृतकको शव नारायणी अस्पतालमा पोस्टमार्टम गरिएपछि चार दिनदेखि अस्पतालकै शवगृहमा राखिएको छ । पोस्टमार्टम प्रतिवेदन नआएसम्म शव नबुझ्ने अडान माइती पक्षले लिएपछि शव अझै अस्पतालमै रहेको छ ।
घटनाको सत्यतथ्य छानबिन गरी दोषीलाई हदैसम्मको कारबाही गर्न माग गर्दै मृतकका माइती पक्षका महिला, आफन्त तथा स्थानीयहरू सोमबार ठोरीबाट वीरगंज आएका थिए । उनीहरूले नयाँ बसपार्क चोकबाट नाराबाजीसहित घण्टाघरसम्म प्रदर्शन गरेपछि जिल्ला प्रशासन कार्यालय पर्सा पुगेर प्रमुख जिल्ला अधिकारी भोला दाहाललाई ज्ञापनपत्र बुझाएका छन् ।
ज्ञापनपत्र बुझाउँदै ठोरी गाउँपालिकाकी उपाध्यक्ष गोकुली रेग्मीले लक्ष्मीले आत्महत्या नगरेको दाबी गर्दै उनका पति, सासु र ससुराले कुटपिट गरी हत्या गरेपछि शव गोठमा झुण्ड्याएको आरोप लगाइन् । घटनामा संलग्न सबैलाई कानुनबमोजिम कडा कारबाही गर्न उनले माग गरिन् ।
माइती पक्षले मृतकका पति सुधिर सिलवाल, सासु–ससुरा तथा सुधिरका दिदी र भिनाजुको समेत घटनामा संलग्नता रहेको आरोप लगाएको छ ।
प्रमुख जिल्ला अधिकारीलाई बुझाइएको ज्ञापनपत्रमा अस्पतालले तयार पारेको पोस्टमार्टम प्रतिवेदनप्रति शंका व्यक्त गर्दै पुनः पोस्टमार्टम गर्न, घटनाको निष्पक्ष अनुसन्धानका लागि छानबिन समिति गठन गर्न, मृतकको मोबाइल र ब्याग सार्वजनिक गर्न तथा घटनामा संलग्न भनिएका सबै व्यक्तिलाई तत्काल पक्राउ गर्न माग गरिएको छ ।
जिल्ला प्रहरी कार्यालय पर्साका प्रवक्ता तथा प्रहरी नायब उपरीक्षक चक्रबहादुर मल्लका अनुसार घटनाको दिन नै मृतकका पति सुधिर सिलवाललाई नियन्त्रणमा लिएर अनुसन्धान भइरहेको छ । सासु र ससुरालाई पनि प्रारम्भिक रूपमा नियन्त्रणमा लिइए पनि वृद्ध अवस्थाका कारण आफन्तहरूको सहमतिमा तारिखमा छाडिएको उनले बताए ।
डीएसपी मल्लले अस्पतालबाट पोस्टमार्टम प्रतिवेदन हालसम्म प्रहरीलाई प्राप्त नभएको र प्रतिवेदन आएपछि मात्रै मृत्युको यकिन कारण खुल्ने बताए । घटनाबारे विस्तृत अनुसन्धान जारी रहेको उनको भनाइ छ ।
