वीरगंज । जिल्ला प्रहरी कार्यालय ताप्लेजुङले २०८३ साल असार महिनाका लागि प्रहरी निरीक्षक जटाशंकर यादवलाई ‘उत्कृष्ट प्रहरी (Best Police of the Month)’ घोषणा गरेको छ ।
जिल्ला प्रहरी कार्यालयका अनुसार प्रहरी निरीक्षक यादवले विभागीय मूल्य–मान्यता, आदेश–निर्देशनको पूर्ण पालना गर्दै व्यावसायिक, लगनशील र कर्तव्यनिष्ठ रूपमा जिम्मेवारी निर्वाह गरेका कारण उनलाई उक्त सम्मान प्रदान गरिएको हो ।
अपराध अनुसन्धान शाखाका प्रमुखका रूपमा कार्यरत यादवले जिल्लामा शान्ति सुरक्षा कायम राख्न, विपद् व्यवस्थापनका क्रममा तत्काल परिचालन भई क्षति न्यूनीकरण गर्न तथा विभिन्न आपराधिक घटनाको सूक्ष्म अनुसन्धान गरी संलग्न अभियुक्तलाई पक्राउ गरेर कानुनी दायरामा ल्याउन उल्लेखनीय भूमिका खेलेका छन् ।
त्यसैगरी, समुदाय तथा सरोकारवाला निकायसँग समन्वय गरी अपराध नियन्त्रण तथा समुदाय–केन्द्रित जनचेतनामूलक कार्यक्रम सञ्चालन गरेको, जिल्ला प्रहरी कार्यालयको पूर्वाधार विकासमा योगदान पुर्याएको तथा मातहतका प्रहरी कर्मचारीहरूको प्रभावकारी सुपरिवेक्षणमार्फत प्रहरी संगठनको छवि सुदृढ बनाउन महत्त्वपूर्ण भूमिका निर्वाह गरेको कार्यालयले जनाएको छ ।
प्रहरी निरीक्षक यादवले आफूलाई दिइएको जिम्मेवारी अनुशासित, इमान्दार र पूर्ण निष्ठाका साथ सम्पादन गरेको मूल्याङ्कन गर्दै कार्यालय प्रमुख प्रहरी नायब उपरीक्षक उमेश जोशीले उनलाई २०८३ साल असार महिनाको ‘उत्कृष्ट प्रहरी’ घोषणा गरेका हुन् ।
