काठमाडौं । छायांकनरत नेपाली फिल्म ‘चिरञ्जीवि भवः’ विवादमा तानिएको छ । अभिनेत्री काजल कर्णले आफू मधेशी भएकै कारण विभेद गरिएको र फिल्मबाट हटाइएको आरोप लगाएपछि विवाद सार्वजनिक भएको हो ।
शुक्रबार राति सामाजिक सञ्जालमार्फत आफ्नो धारणा सार्वजनिक गर्दै कर्णले फिल्मको सेटमा आफूलाई ‘मधेशिनी’ भन्दै जिस्काइएको, वर्ण तथा भूगोलका आधारमा उपहास गरिएको र केही प्राविधिक तथा छायांकन टोलीका सदस्यबाट अपमानजनक व्यवहार भएको दाबी गरेकी छन् । उनले यस घटनामा संलग्न भएको आरोप लगाउँदै केही प्राविधिक सदस्यहरूको नामसमेत उल्लेख गरेकी छन् ।
३५० भन्दा बढी मैथिली, भोजपुरी तथा नेपाली म्युजिक भिडियोमा अभिनय गरिसकेकी कर्णले आफूलाई फिल्मबाट हटाउनुका साथै काम गरेबापतको पारिश्रमिकसमेत नदिएको आरोप लगाएकी छन् । नेपाली चलचित्र क्षेत्रमा कुनै कलाकारले आफू मधेशी भएकै कारण परियोजनाबाट हटाइएको आरोप सार्वजनिक रूपमा लगाएको सम्भवतः यो पहिलो घटना मानिएको छ ।
यता, फिल्मका निर्देशक दीपक आचार्य ‘काकु’ले कर्णले लगाएका आरोप निराधार रहेको बताएका छन् । सामाजिक सञ्जालमार्फत प्रतिक्रिया दिँदै उनले कर्णले आफूलाई यसबारे कुनै जानकारी नगराएको उल्लेख गरेका छन् ।
निर्देशक आचार्यले यदि कुनै सदस्यबाट विभेदपूर्ण व्यवहार भएको पुष्टि भएमा दोषीमाथि तत्काल कारबाही गरिने स्पष्ट पारेका छन् । उनले कर्णले अभिनय गरेका सबै दृश्यहरूको फुटेज सुरक्षित रहेको उल्लेख गर्दै गोबर सोहर्न लगाइएकोजस्ता आरोप प्रमाणित गर्न चुनौतीसमेत दिएका छन् । पारिश्रमिकबारे भने सबै कलाकारलाई डबिङ सम्पन्न भएपछि तेस्रो किस्ता भुक्तानी गर्ने प्रचलन रहेको उनको भनाइ छ ।
यसैबीच, नेपाल चलचित्र कलाकार संघले घटनाप्रति गम्भीर ध्यानाकर्षण भएको जनाएको छ । संघले हालसम्म औपचारिक उजुरी प्राप्त नभए पनि दुवै पक्षलाई छलफलका लागि बोलाइएको जानकारी दिएको छ ।
संघले जारी गरेको विज्ञप्तिमा आरोपहरू गम्भीर प्रकृतिका भएकाले आवश्यक छलफल र अनुसन्धानपछि मात्र निष्कर्षमा पुग्न सकिने उल्लेख गरिएको छ । साथै, सामाजिक सञ्जालमार्फत आरोप–प्रत्यारोप गर्नुको सट्टा संयमित संवाद र आपसी छलफलबाट समस्या समाधान गर्न दुवै पक्षलाई आग्रह गरिएको छ ।
