काठमाडौँ । सरकारले आगामी आर्थिक वर्ष २०८३/८४ का लागि कुल २१ खर्ब २४ अर्ब ३४ करोड रुपैयाँको बजेट सार्वजनिक गरेको छ ।
सङ्घीय संसद्को संयुक्त बैठकमा बजेट प्रस्तुत गर्दै अर्थमन्त्री डा. स्वर्णिम वाग्ले ले कुल विनियोजनमध्ये चालुतर्फ १२ खर्ब ७० अर्ब ५८ करोड रुपैयाँ अर्थात् ५९ दशमलव ८ प्रतिशत बजेट छुट्याइएको जानकारी दिनुभयो ।
त्यस्तै, पुँजीगत खर्चतर्फ ४ खर्ब ३१ अर्ब १० करोड रुपैयाँ अर्थात् २० दशमलव ३ प्रतिशत तथा वित्तीय व्यवस्थातर्फ ४ खर्ब २२ अर्ब ६४ करोड रुपैयाँ अर्थात् १९ दशमलव ९ प्रतिशत बजेट विनियोजन गरिएको छ । सरकारले यो खर्च अनुमान चालु आर्थिक वर्षको संशोधित अनुमानभन्दा करिब २५ प्रतिशतले बढी रहेको जनाएको छ ।
सरकारले आगामी आवका लागि अनुमान गरिएको खर्च व्यवस्थापन गर्न राजस्वबाट १४ खर्ब ५ अर्ब ३१ करोड रुपैयाँ तथा वैदेशिक अनुदानबाट ६१ अर्ब ७४ करोड रुपैयाँ प्राप्त हुने अनुमान गरेको छ । बाँकी अपुग हुने ६ खर्ब ५७ अर्ब २९ करोडमध्ये २ खर्ब ४७ अर्ब २८ करोड रुपैयाँ वैदेशिक ऋणमार्फत जुटाइनेछ ।
त्यसैगरी, राजस्व तथा वैदेशिक सहायताबाट अपुग हुने ४ खर्ब १० अर्ब रुपैयाँ आन्तरिक ऋणमार्फत व्यवस्थापन गरिने सरकारले जनाएको छ । आगामी आर्थिक वर्ष २ खर्ब ४५ अर्ब ८९ करोड रुपैयाँ आन्तरिक ऋणको साँवा भुक्तानी हुने भएकाले खुद १ खर्ब ६४ अर्ब ११ करोड रुपैयाँ मात्र आन्तरिक ऋण परिचालन हुने अनुमान गरिएको छ ।
वित्तीय हस्तान्तरणअन्तर्गत राष्ट्रिय प्राकृतिक स्रोत तथा वित्त आयोगको सिफारिसअनुसार प्रदेश सरकारलाई ६१ अर्ब ५० करोड रुपैयाँ तथा स्थानीय तहलाई ९० अर्ब २० करोड रुपैयाँ वित्तीय समानीकरण अनुदान उपलब्ध गराइने भएको छ ।
पूर्वाधार आयोजना कार्यान्वयनका लागि प्रदेश तहमा ४ अर्ब ६० करोड रुपैयाँ र स्थानीय तहमा ८ अर्ब ९३ करोड रुपैयाँ समपूरक अनुदान उपलब्ध गराइने बजेटमा उल्लेख छ ।
त्यस्तै, प्रदेशका लागि ३ अर्ब ८२ करोड रुपैयाँ तथा स्थानीय तहका लागि ९ अर्ब ४० करोड रुपैयाँ विशेष अनुदान विनियोजन गरिएको छ ।
सङ्घीय सरकारका आयोजना कार्यान्वयनका लागि प्रदेश तहमा ४९ अर्ब ७२ करोड रुपैयाँ र स्थानीय तहमा २ खर्ब ६ अर्ब ८ करोड रुपैयाँ सशर्त अनुदान वितरण गरिने भएको छ ।
प्रदेश तथा स्थानीय तहलाई राजस्व बाँडफाँटबाट कुल १ खर्ब ७५ अर्ब रुपैयाँ हस्तान्तरण हुने अनुमान गरिएको सरकारले जनाएको छ । आगामी आवमा राजस्व बाँडफाँट, रोयल्टी तथा वित्तीय हस्तान्तरणमार्फत प्रदेश र स्थानीय तहमा ६ खर्ब रुपैयाँभन्दा बढी स्रोत परिचालन हुने प्रक्षेपण गरिएको छ ।
बजेटको पूर्णपाठ तलकाे लिंकमा हेर्न सकिन्छ ।
https://mof.gov.np/content/1741/budget-statement-for-the-financial-year-2083-84/
