वीरगंज । मधेश क्रिकेट लिगको दोस्रो संस्करणको उपाधि बाराले लगातार दोस्रो पटक जितेको छ । वीरगंजस्थित टीबी साह क्रिकेट रंगशालामा शुक्रबार सम्पन्न फाइनल खेलमा बाराले धनुषालाई १२८ रनले पराजित गरेको हो ।
टस हारेर ब्याटिङ गरेको बाराले २० ओभरमा ६ विकेट गुमाउँदै १९३ रन बनाएको थियो । बाराका लागि सुशान्त सिंहले ५१ रन तथा अरनिको यादवले ५० रनको अर्धशतकीय योगदान दिएका थिए । धनुषाका रुपेश यादव र आयुष यादवले समान २/२ विकेट लिए ।
१९४ रनको लक्ष्य पछ्याएको धनुषा १४ ओभर ४ बलमा ६५ रनमै समेटियो । बाराका कमल गुप्ता ले ३.४ ओभरमा १३ रन खर्चेर ४ विकेट लिँदै उत्कृष्ट बलिङ प्रदर्शन गरे ।
अरनिको यादव ब्याटिङसँगै बलिङमा पनि प्रभावशाली प्रदर्शन गर्दै ‘प्लेयर अफ द म्याच’ घोषित भए । प्रतियोगिताभर उत्कृष्ट प्रदर्शन गरेका बाराका कप्तान अनिल साह १५७ रन र १३ विकेटसहित ‘प्लेयर अफ दि सिरिज’ घोषित भए ।
मधेश प्रदेश क्रिकेट संघको आयोजनामा भएको प्रतियोगितामा मधेश प्रदेशका आठवटै जिल्लाका टिम सहभागी थिए । विजेता टोलीलाई मधेश खेलकुद परिषदका सदस्य सचिव शिवजी गुप्ताले ट्रफी तथा पुरस्कार राशी बराबरको चेक वितरण गरेका थिए ।
सो अवसरमा नेपाल क्रिकेट संघका उपाध्यक्ष राेशन सिंह, नेपाल क्रिकेट संघ मधेश प्रदेशका अध्यक्ष सुभाष जयसवाल, पर्सा क्रिकेट संघका अध्यक्ष मनिष सिंह, राष्ट्रिय स्वतन्त्र पार्टीका युवा नेता सुधिर पटेल, प्याप्सन वीरगंज महानगरका अध्यक्ष राहुल श्रीवास्तव लगायतको उपस्थिति रहेको थियो । कार्यक्रमको सञ्चालन प्याप्सन वीरगंजका सचिव अमित आलोकले गरेका थिए ।
