वीरगंज । वीरगंजस्थित हरिखेतान बहुमुखी क्याम्पसमा लामो समयदेखि चल्दै आएको विवाद बिहीबार दुर्व्यवहार र कुटाकुटको घटनामा परिणत भएको छ । क्याम्पस परिसरमै शिक्षकहरूबीच हातपात तथा क्याम्पस प्रमुखमाथि कालोमोसो दलिएको भिडियो सामाजिक सञ्जालमा भाइरल भएपछि घटनाको चौतर्फी आलोचना भइरहेको छ ।
जिल्ला प्रहरी कार्यालय पर्साका अनुसार क्याम्पस प्रमुख किशोरी रायमाथि दुर्व्यवहार भएको घटनामा संलग्न रहेको आरोपमा दुई जनालाई पक्राउ गरिएको छ । पक्राउ परेकामाथि अभद्र व्यवहार मुद्दामा ७ दिनको म्याद थप गरी अनुसन्धान भइरहेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले जानकारी दिए ।
प्रवक्ता बस्नेतले पक्राउ परेकाहरूको नाम सार्वजनिक नगरे पनि प्रहरी स्रोतका अनुसार पक्राउ पर्नेमा क्याम्पसकै शिक्षक दिलिप प्रजापति र सह–लेखापाल देवलाल ठाकुर रहेका छन् ।
सामाजिक सञ्जालमा भाइरल भएको भिडियोमा क्याम्पस प्रमुख राय र शिक्षक प्रजापतिबीच तानातान तथा लछारपछार भएको देखिन्छ । शिक्षण संस्थाभित्रै शिक्षकहरूबीच हात हालाहालको अवस्था सिर्जना भएपछि क्याम्पस प्रशासन र शैक्षिक वातावरणमाथि प्रश्न उठ्न थालेको छ ।
के हो विवादको कारण ?
हरिखेतान बहुमुखी क्याम्पसमा सञ्चालक समितिको हस्तक्षेप तथा निजीकरणको प्रयास भएको आरोप लगाउँदै विगत एक वर्षदेखि विवाद हुँदै आएको छ ।
पछिल्लो समय पुनः नियुक्त गरिएका क्याम्पस प्रमुख किशोरी राय र व्यवस्थापन समितिको मिलेमतोमा करारमा कार्यरत चार जना शिक्षकलाई सेवाबाट हटाउने निर्णय भएपछि विवाद झन् चर्किएको हो । क्याम्पस प्रशासनले वैशाख २१ गतेदेखि लागू हुने गरी लालकिशोर प्रसाद पटेल, रविन्द्रकुमार यादव, पूजा गुप्ता र दिलिपकुमार पण्डितको करार सेवा अन्त्य गर्ने निर्णय गरेको थियो ।
उक्त निर्णयको विरोधमा शिक्षक तथा कर्मचारीहरूले क्याम्पसमा तालाबन्दी गर्नुका साथै धर्ना कार्यक्रम सञ्चालन गर्दै आएका थिए । क्याम्पस प्रमुख रायले पटक–पटक ताला खोल्न आग्रह गरे पनि सहमति हुन नसक्दा विवाद बढ्दै गएको बताइएको छ । सोही क्रममा बिहीबार उनीमाथि दुर्व्यवहार भएको जनाइएको छ ।
घटनापछि केही समय क्याम्पस क्षेत्रमा तनावसमेत उत्पन्न भएको थियो ।
यस विषयमा प्रतिक्रिया लिन क्याम्पस प्रमुख किशोरी रायसँग फोन सम्पर्क गर्ने प्रयास गरिए पनि सम्पर्क हुन सकेन । यस्तै, क्याम्पसका सल्लाहकार जयप्रकाश खेतानले घटना लज्जास्पद भएको प्रतिक्रिया दिएका छन् । उनले पनि घटना बारे क्याम्पस प्रमुखसँग बुझ्न वताए ।
घटनाकाे कारण बारे बुझ्न क्याम्पस संचालक समितिका अध्यक्ष प्रेम प्रकाश खेतानसँग सम्पर्क गर्न खोज्दा फोन नलागेको कारण सम्पर्क हुन सकेन । वीरगंज महानगरपालिकाका शिक्षा शाखाका प्रमुख आनन्द लामिक्षानेकाे प्रतिक्रिया लिन पनि फाेनमा सम्पर्क गर्दा उनकाे पनि फाेन नउठेका कारण सम्पर्क हुन सकेन ।
सामुदायिक क्याम्पसलाई खेतान परिवारले निजीकरण गर्न खोजेको आरोपसमेत लाग्दै आएको छ । संचालक समितिका अध्यक्ष विपी खेतान प्रायः काठमाडौंमै बस्ने, क्याम्पसमा कहिले नदेखिने तथा लामो समयदेखि जारी विवाद समाधानका लागि सक्रिय पहल नगरेको भन्दै अभिभावहरुले असन्तुष्टि जनाएका छन् । उनीहरूले यसले क्याम्पसमा अध्ययनरत विद्यार्थीहरूको भविष्य अन्योलमा परेको बताएका छन् ।
