जनकपुर । राष्ट्रिय दलित नेटवर्क (RDN) नेपालको आयोजनामा तथा सहिदनगर नगरपालिकासँगको समन्वयमा हरवाचरवा एक्टिभिष्टहरूका लागि दुई दिने पैरालिगल तालिम बुधबारदेखि धनुषाको सहिदनगरमा सुरु भएको छ।
तालिममा छनोट भएका १५ जना अभियन्ताहरूको सहभागिता रहेको छ। सहभागीहरूको संवैधानिक अधिकार, मानव अधिकार, श्रम कानुन, नागरिकता तथा भूमि अधिकार, लैङ्गिक हिंसा तथा भेदभावविरुद्धका कानुनी प्रावधानबारे ज्ञान अभिवृद्धि गर्नु तालिमको मुख्य उद्देश्य रहेको आयोजकले जनाएको छ।
कार्यक्रमको उद्घाटन सहिदनगर नगरपालिकाकी उप–प्रमुख सुनीता सिंहले गर्नुभएको थियो। उहाँले तालिमको समग्र तथा व्यवहारिक संरचनाको प्रशंसा गर्दै विशेषगरी हरवाचरवा समुदायजस्ता सीमान्तकृत समूहलाई न्याय प्रणाली तथा सार्वजनिक सेवासँग जोड्न पैरालिगलहरूको भूमिका महत्वपूर्ण हुने बताउनुभयो। साथै, उहाँले सहभागीहरूलाई सिकाइलाई समुदायस्तरमा व्यवहारमा उतार्न सक्रिय सहभागिताको आवश्यकता औंल्याउनुभयो।
उद्घाटन सत्रमा सहिदनगर नगरपालिकाका प्रमुख प्रशासकीय अधिकृत अनिल कुमार झा, राष्ट्रिय हरवाचरवा अधिकार मञ्चका उपाध्यक्ष प्रसाद सदा तथा जिल्ला हरवाचरवा अधिकार मञ्च धनुषाका अध्यक्ष राज देव बिनले पनि आफ्नो धारणा राख्नुभएको थियो।
कानुनी विज्ञ सञ्जु पाण्डे तथा RDN का कार्यकारी निर्देशक हुकुम बहादुर सार्कीको सहजीकरणमा सञ्चालन भइरहेको उक्त तालिमले सहभागीहरूलाई मुद्दा दस्तावेजीकरण, परामर्श, मेलमिलाप तथा सन्दर्भ सेवासम्बन्धी व्यवहारिक सीप प्रदान गर्नेछ ।
