बर्दिबास । नेपाली सेना र सञ्चारजगतबीचको सम्बन्धलाई थप मजबुत, विश्वसनीय र प्रभावकारी बनाउने उद्देश्यले मधेस प्रदेशका पत्रकारका लागि चारदिने ‘रक्षा संवाददाता अभिमुखीकरण कार्यक्रम’ मंगलबारदेखि बर्दिबासमा सुरु भएको छ।
श्री मध्यपूर्वी पृतना हेडक्वार्टर बर्दिबासको आयोजनामा सुरु भएको कार्यक्रमको शुभारम्भ पृतनापति भुवन केसीले गर्नुभएको हो। कार्यक्रममा मधेस प्रदेशका विभिन्न सञ्चारमाध्यममा कार्यरत २१ जना सञ्चारकर्मी सहभागी छन्।
अभिमुखीकरणमार्फत सञ्चारकर्मीलाई नेपाली सेनाको संगठनात्मक संरचना, जिम्मेवारी, भूमिका तथा प्रमुख गतिविधिबारे जानकारी गराइनेछ। सेनासम्बन्धी समाचार संकलन तथा सम्प्रेषण गर्दा तथ्यमा आधारित र सहज रूपमा समाचार तयार गर्न कार्यक्रम उपयोगी हुने आयोजकले जनाएको छ।
कार्यक्रम संयोजक प्रमुख सेनानी प्रतिभा थापाले पत्रकार र नेपाली सेनाबीच समन्वय तथा आपसी समझदारीलाई थप प्रभावकारी बनाउने उद्देश्यले अभिमुखीकरण आयोजना गरिएको बताउनुभयो।
चार दिनसम्म सञ्चालन हुने कार्यक्रममा नेपाली सेनाको कार्यक्षेत्रसँगै विपद् प्रतिक्रिया, समसामयिक विषय तथा संकटका समयमा सञ्चारमाध्यमको भूमिका लगायतका विषयमा प्रस्तुतीकरण र अन्तरक्रिया गरिनेछ।
सेनाका गतिविधि र जिम्मेवारीबारे सञ्चारकर्मीलाई प्रत्यक्ष जानकारी गराउने यस्ता कार्यक्रमले सुरक्षा निकाय र सञ्चारमाध्यमबीचको समन्वय बढाउनुका साथै तथ्यपूर्ण र जिम्मेवार समाचार सम्प्रेषणमा सहयोग पुग्ने अपेक्षा गरिएको छ।
