वीरगंज । उज्यालो नेपाल पार्टी, मधेश प्रदेश समितिको बैठक आइतबार जनकपुरमा सम्पन्न भएको छ। बैठक रामकिशोर सिंहको अध्यक्षतामा सम्पन्न भएको हो भने प्रमुख अतिथिका रूपमा पार्टीका केन्द्रीय सदस्य धनबहादुर मइचन तथा प्रदेश इन्चार्ज विनय प्राबीणको विशेष उपस्थिति रहेको थियो।
बैठकमा प्रदेशका सम्पूर्ण पदाधिकारी तथा जिल्ला संयोजकहरूको उल्लेख्य सहभागिता रहेको थियो। सहभागीहरूले पार्टी संगठनलाई मधेश प्रदेशभर थप सुदृढ र विस्तार गर्ने विषयमा विस्तृत छलफल गरेका थिए।
बैठकले जेष्ठ १५ गतेभित्र जिल्लास्तरमा भेला सम्पन्न गर्ने, सदस्यता अभियानलाई तीव्रता दिने तथा संगठनलाई तल्लो तहसम्म मजबुत बनाउने निर्णय गरेको छ। साथै, शिक्षा र स्वास्थ्य क्षेत्रमा निःशुल्क शिविर सञ्चालन गर्ने सामाजिक कार्यक्रमलाई प्राथमिकताका साथ अघि बढाउने निर्णय पनि गरिएको छ।
यसैगरी, युवाहरूलाई केन्द्रमा राख्दै “उज्यालो जेनजी फ्रन्ट लाइन” अभियान सञ्चालन गर्ने निर्णय गरिएको छ। उक्त अभियानले संगठनलाई नयाँ उचाइमा पुर्याउने विश्वास व्यक्त गर्दै संयोजकका रूपमा रन्जित साहलाई मनोनित गरिएको छ।
उज्यालो नेपाल पार्टी मधेश प्रदेश समितिले यी निर्णयहरू मार्फत जनताको सेवा, सामाजिक उत्तरदायित्व र संगठन सुदृढीकरणमा दृढतापूर्वक अघि बढ्ने प्रतिबद्धता जनाएको छ।
