वीरगंज । अपहरण तथा कर्तव्य ज्यान मुद्दामा २५ वर्ष कैद सजाय पाएका फरार अभियुक्त पर्साबाट पक्राउ परेका छन् ।विशेष सूचनाको आधारमा खटिएको प्रहरी टोलीले भारत विहार, जिल्ला वेतीया थाना बगाहा निवासी ३० वर्षीय विकास शर्मालाई नियन्त्रणमा लिएको जिल्ला प्रहरी कार्यालय पर्साले जनाएकाे छ ।
आइतबार दिउँसो करिब ३ बजे वीरगंज महानगरपालिका–२४ रामगढवा क्षेत्रबाट लुकिछिपी बस्दै आएका उनलाई पक्राउ गरिएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले जानकारी दिए ।
शर्मा ‘Zen-Z’ आन्दोलनका क्रममा केन्द्रीय कारागार जगन्नाथदेवलबाट फरार भएका थिए । उनीविरुद्ध अपहरण तथा कर्तव्य ज्यान मुद्दामा २५ वर्ष कैद सजाय तोकिएको थियो । प्रहरीका अनुसार उनी २०८२ भदौ २४ गतेदेखि फरार रहेका थिए ।
पक्राउ परेका शर्मालाई आवश्यक कानुनी प्रक्रिया पूरा गरी सम्बन्धित कारागार कार्यालयमा बुझाउने कार्य भइरहेको प्रहरीले जनाएको छ । प्रहरी नायब उपरीक्षक बस्नेतले फरार अभियुक्तको खोजी तथा नियन्त्रण कार्यलाई तीव्र बनाइएको जानकारी दिएका छन् ।
