वीरगंज । पर्सामा अवैध रूपमा ओसारपसार हुँदै गरेको साल काठसहित एक ट्याक्टर नियन्त्रणमा लिइएको छ । सबैया सब डिभिजन वन कार्यालयको टोलीले उक्त कारबाही गरेको हो ।
आइतबार बिहान प्राप्त सूचनाका आधारमा वीरगंज महानगरपालिका वडा नं. ३१ स्थित मिलन चोकमा सबैया सब डिभिजन वन कार्यालय र सबैया साझेदारी वन उपभोक्ता समूहको संयुक्त गस्ती टोलीले प्रदेश २–०३–००१ त १५७५ नम्बरको ट्याक्टरसहित साल काठ बरामद गरेको हो।
सो क्रममा वीरगंज महानगरपालिका वडा नं. २९ मुसौलीका कृष्ण प्रसाद साहलाई नियन्त्रणमा लिइएको छ । पक्राउ परेका साह र बरामद गरिएको काठसहित ट्याक्टरलाई आवश्यक कारबाहीका लागि डिभिजन वन कार्यालय पर्सा पठाइएको जनाइएको छ ।
सबैया सब डिभिजन वन कार्यालयका रेन्जर भुपाल रोकायका अनुसार बरामद गरिएको २४ फिट साल काठ र ट्याक्टरसहित करिब १५ लाख रुपैयाँ बराबरको सामग्री नियन्त्रणमा लिइएको हो।
हाल नियन्त्रणमा लिइएको काठ तथा ट्याक्टरलाई थप अनुसन्धान तथा कारबाहीका लागि सबैया सब डिभिजन वन कार्यालय सबैयामा राखिएको छ ।
