वीरगंज । पाँचौं परवानीपुर गोल्डकप फुटबल प्रतियोगिता को उपाधि निजगढ फुटबल क्लब ले उचालेको छ । शनिबार भएको फाइनल खेलमा निजगढ फुटबल क्लबले आयोजक शक्ति युवा क्लब लाई ३–० गोल अन्तरले पराजित गर्दै उपाधि जितेको हो ।
परवानीपुर खेल मैदानमा सम्पन्न खेलको पहिलो हाफ गोलरहित बराबरीमा सकिएको थियो । दोस्रो हाफ सुरु भएसँगै खेल रोमाञ्चक बनेको थियो । खेलको ५६औँ मिनेटमा निजगढका शन्तबहादुर गुरुङ ले पहिलो गोल गरेका थिए भने ५९औँ मिनेटमा उनले नै दोस्रो गोल थप्दै टोलीलाई बलियो अग्रता दिलाए ।
अन्तिम समयमा थपिएको अतिरिक्त ६ मिनेटको खेलको अन्त्यतिर सृजन क्षेत्री ले तेस्रो गोल गर्दै जित सुनिश्चित गरेका थिए ।
खेलको ‘म्यान अफ दि म्याच’ शन्तबहादुर गुरुङ घोषित हुँदै नगद २१ सयसहित शिल्ड र प्रमाणपत्र प्राप्त गरे। बेस्ट प्रशिक्षकको पुरस्कार सन्तोष गुरुङ, बेस्ट गोलकिपर युनिस चौधरी, बेस्ट फरवार्ड बिक्रम थोकर र बेस्ट मिडफिल्डर अजित चौधरी ले प्राप्त गरे ।
त्यसैगरी ‘म्यान अफ द सिरिज’ सन्दीप यादव घोषित हुँदै नगद ५१ सयसहित शिल्ड र प्रमाणपत्र प्राप्त गरे ।
उपाधि विजेता निजगढ फुटबल क्लबले नगद २ लाखसहित शिल्ड र प्रमाणपत्र प्राप्त गर्यो । उक्त पुरस्कार रामक्षत्री प्रसाद कुर्मी ले वितरण गरेका थिए । उपविजेता शक्ति युवा क्लबले नगद १ लाखसहित शिल्ड र प्रमाणपत्र प्राप्त गरेको थियो, जुन राधाकृष्ण साह रौनियार ले वितरण गरेका थिए ।
प्रतियोगिताका संयोजक संजय मण्डलको अध्यक्षतामा सम्पन्न कार्यक्रममा स्वागत मन्तव्य क्लब अध्यक्ष सुबोध श्रीवास्तवले गरेका थिए भने विभिन्न विधाका पुरस्कार हेमन्त चौरसीया ले वितरण गरेका थिए ।
