वीरगंज । पाँचौं परवानीपुर गोल्डकप फुटबल प्रतियोगिता अन्तर्गत शुक्रबार सम्पन्न महिला मैत्रीपूर्ण खेलमा वीरगन्ज युथ एकेडेमी विजयी भएको छ।
परवानीपुर खेल मैदानमा भएको प्रतिस्पर्धात्मक खेलमा वीरगन्ज युथ एकेडेमीले निजगढ फुटबल क्लबलाई १–० गोल अन्तरले पराजित गरेको हो। खेलको २५ औं मिनेटमा वीरगन्ज युथ एकेडेमीकी खेलाडी संगीता थिङले गरेको गोल नै निर्णायक बनेको थियो।
उक्त खेलमा उत्कृष्ट प्रदर्शन गरेबापत संगीता थिङ ‘म्यान अफ दि म्याच’ घोषित भइन्। उनले नगद २१०० रुपैयाँ पुरस्कार प्राप्त गरिन्। उनलाई कार्यक्रमका प्रमुख अतिथि तथा प्रतिनिधि सभा सदस्य रहबर अन्सारीले पुरस्कार प्रदान गरेका थिए।
यसैबीच, प्रतियोगिताको उपाधिका लागि शनिबार आयोजक शक्ति युवा क्लब र निजगढ फुटबल क्लबबीच प्रतिस्पर्धा हुने आयोजकले जनाएको छ।
प्रतियोगिताका संयोजक संजय मण्डलको अध्यक्षतामा आयोजित कार्यक्रममा प्रमुख अतिथि अन्सारीले प्रतियोगिताको उद्घाटन गरेका थिए। “राष्ट्रको लागि खेलकुद, स्वास्थ्यको लागि खेलकुद” भन्ने नारासहित सञ्चालन भइरहेको पाँचौं परवानीपुर गोल्डकप–२०८३ करिब १७ लाख रुपैयाँको लागतमा आयोजना गरिएको सह–संयोजक दिपक यादवले जानकारी दिए।
प्रतियोगितामा प्रथम हुने टोलीलाई २ लाख रुपैयाँ र उपविजेतालाई १ लाख रुपैयाँ पुरस्कार प्रदान गरिनेछ। साथै उत्कृष्ट डिफेन्डर, फरवार्ड, दैनिक उत्कृष्ट खेलाडी तथा प्रतियोगिताभरिका उत्कृष्ट खेलाडीलाई समेत नगद पुरस्कार प्रदान गरिने आयोजक क्लबका अध्यक्ष सुबोध श्रीवास्तवले बताए। प्रतियोगिताभरिका उत्कृष्ट खेलाडीलाई ५१०० रुपैयाँ नगद पुरस्कार दिइनेछ।
