वीरगंज । पाँचौं परवानीपुर गोल्डकप फुटबल प्रतियोगिताको उपाधिका लागि आयोजक शक्ति युवा क्लब र निजगढ फुटबल क्लब निजगढबीच प्रतिस्पर्धा हुने भएको छ।
बिहीबार सम्पन्न दोस्रो सेमिफाइनल खेलमा निजगढ फुटबल क्लबले रिगल हेटौंडा एन्फा मकवानपुरलाई २–१ गोल अन्तरले पराजित गर्दै फाइनलमा स्थान सुरक्षित गरेको हो। परवानीपुर खेल मैदानमा भएको खेलको पहिलो हाफसम्म दुवै टिम १–१ गोलको बराबरीमा रहेका थिए।
खेलको १४औं मिनेटमा रिगल हेटौंडाका अभिषेक कुमारले पहिलो गोल गर्दै टोलीलाई अग्रता दिलाएका थिए। त्यसपछि ३९औं मिनेटमा निजगढका सन्तबहादुर गुरुङले गोल फर्काउँदै खेललाई बराबरीमा ल्याए। दोस्रो हाफमा झनै आक्रामक बनेको निजगढका लागि ६५औं मिनेटमा पुनः सन्तबहादुर गुरुङले निर्णायक गोल गर्दै टोलीलाई जित दिलाए।
उत्कृष्ट प्रदर्शन गरेका निजगढका सन्तबहादुर गुरुङ म्यान अफ दि म्याच घोषित हुँदै २१०० रुपैयाँ नगद पुरस्कार प्राप्त गरे। उक्त पुरस्कार समाजसेवी जतन राउत कुर्मीले प्रदान गरेका थिए।
यसअघि पहिलो सेमिफाइनलमा आयोजक शक्ति युवा क्लबले सडेन डेथमा ९–८ गोल अन्तरले वीरगंज युनाइटेड क्लबलाई पराजित गर्दै फाइनलमा प्रवेश गरेको थियो।
प्रतियोगिताअन्तर्गत शुक्रबार वीरगंज युथ क्लबको महिला टोली र निजगढ फुटबल क्लबको महिला टोलीबीच मैत्रीपूर्ण खेल आयोजना गरिने छ।
प्रतियोगिताका संयोजक संजय मण्डलको अध्यक्षतामा सञ्चालित कार्यक्रमको उद्घाटन हिमालय डिस्टिलरी लिमिटेडका प्रबन्धक कृष्णहरि अधिकारीले गरेका थिए। “राष्ट्रको लागि खेलकुद, स्वास्थ्यका लागि खेलकुद” भन्ने नारासहित सञ्चालन भइरहेको प्रतियोगिता करिब १७ लाख रुपैयाँ लागतमा आयोजना गरिएको सह–संयोजक दीपक यादवले जानकारी दिए।
आयोजक शक्ति युवा क्लबका अध्यक्ष सुबोध श्रीवास्तवका अनुसार प्रतियोगिताको विजेतालाई २ लाख रुपैयाँ र उपविजेतालाई १ लाख रुपैयाँ नगद पुरस्कार प्रदान गरिनेछ। साथै उत्कृष्ट डिफेन्डर, फरवार्ड, दैनिक उत्कृष्ट खेलाडी तथा समग्र प्रतियोगिताको उत्कृष्ट खेलाडीलाई समेत नगद पुरस्कारको व्यवस्था गरिएको छ, जसमा उत्कृष्ट खेलाडीलाई ५१०० रुपैयाँ प्रदान गरिनेछ।
