वीरगंज । पर्साकाे छिपहरमाई गाउँपालिका वडा नं. ३ स्थित जयमंगलापुरमा “जयमंगलापुर प्रिमियर लिग (JPL)” क्रिकेट प्रतियोगिताको उद्घाटन सम्पन्न भएको छ। प्रतियोगिताको उद्घाटन राष्ट्रिय स्वतन्त्र पार्टी (रास्वपा) पर्सा क्षेत्र नं. ४ का सभापति जितेन्द्र मिश्रले गरेका हुन् ।
उद्घाटन समारोहमा रास्वपाका युवा नेता प्रदीप पटेल लगायत स्थानीय जनप्रतिनिधि, खेलप्रेमी तथा युवाहरूको उल्लेखनीय उपस्थिति रहेको थियो । कार्यक्रमलाई सम्बोधन गर्दै प्रमुख अतिथि क्षेत्रिय सभापति मिश्रले खेलकुदले समाजमा एकता, अनुशासन र सकारात्मक ऊर्जा फैलाउने बताउँदै यस्ता प्रतियोगिताले ग्रामीण स्तरका प्रतिभाशाली खेलाडीलाई अवसर प्रदान गर्ने विश्वास व्यक्त गरे।
उनले भने, “गाउँमै रहेका युवाहरूलाई खेलकुदमार्फत अघि बढाउने उद्देश्यले गरिएको यस्तो प्रयास अत्यन्त सराहनीय छ। यसले लुकेका प्रतिभाहरूलाई उजागर गर्न मद्दत पुर्याउँछ।”
आजको उद्घाटन खेलमा दुई टिमबीच प्रतिस्पर्धा भएको थियो । बुढगाउँ गाउँको टिम र लाइन पर्सा गाउँको टिमबीच रोमाञ्चक खेल सम्पन्न भएको आयोजकले जनाएको छ।
यस प्रिमियर लिगको विशेषता भनेको प्रतियोगितामा सहभागी हुने प्रत्येक टिममा एउटै गाउँका खेलाडी मात्र समावेश हुनुपर्ने नियम रहेको छ । यसले स्थानीय स्तरमै खेलाडीको विकास, गाउँ–गाउँबीच प्रतिस्पर्धा र आपसी भाइचारा मजबुत बनाउने अपेक्षा गरिएको छ।
