वीरगंज । जिल्ला प्रहरी कार्यालय पर्साले ठूलो परिमाणमा प्रतिबन्धित लागूऔषधसहित एक जना भारतीय नागरिकलाई पक्राउ गरेको छ ।
विशेष सूचनाको आधारमा खटिएको प्रहरी टोलीले वैशाख ६ गते राति करिब ९:५५ बजे वीरगंज महानगरपालिका–८ लिंक रोडस्थित समर होटल एण्ड लजमा खानतलासी गर्दा भारत बिहार, मोतीहारी जिल्ला भेलाहीका २० वर्षीय सागर कुमार पटेललाई नियन्त्रणमा लिएको हो ।
प्रहरीले होटलको कोठा नं. १०५ बाट ट्रामाडोल हाइड्रोक्लोराइड (Tramadol Hydrochloride IP-50) नामक प्रतिबन्धित लागूऔषध बरामद गरेको जनाएको छ । बरामद लागूऔषध १ पत्तामा १० ट्याब्लेटका दरले ३ हजार पत्ता अर्थात् कुल ३० हजार ट्याब्लेट रहेको छ ।
पक्राउ परेका पटेलमाथि आवश्यक अनुसन्धान कार्य भइरहेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले जानकारी दिएका छन्।
