वीरगंज । वीरगंज महानगरपालिका क्षेत्रमा मुख्य सडकको दायाँबायाँ २५ मिटरभित्र रहेका अतिक्रमित संरचना हटाउने कार्य सम्पन्न भएको छ।
आइतबार बिहानदेखि डोजर प्रयोग गरी सुरु गरिएको अभियान सोमबारसम्ममा सम्पन्न भएको सडक डिभिजन कार्यालय हेटौंडाले जनाएको छ। त्रिभुवन राजपथअन्तर्गत गण्डक चोकदेखि नेपाल–भारत मितेरी पुलसम्मको सडक खण्डमा रहेका करिब १ हजार २ सय घरटहरामा दुई दिनभित्रै डोजर चलाइएको कार्यालयले जानकारी दिएको छ।
कार्यालयकी इन्जिनियर दिलासा तिवारीका अनुसार भत्काइएका संरचनाबाट निस्किएको फोहोर छिट्टै व्यवस्थापन गर्ने तयारी भइरहेको छ । उनका अनुसार सडक निर्माणका लागि आवश्यक विस्तृत परियोजना प्रतिवेदन (डिपिआर) तयार गर्न विभागअन्तर्गतकै उत्तर–दक्षिण आयोजना निर्देशनालयलाई आग्रह गरिएको छ।
उनले भनिन्, “हाल बजेट अभावका कारण डिपिआर तयारी प्रक्रियामा छौं । डिपिआर तयार भएपछि मात्रै केन्द्रबाट बजेट प्राप्त हुन्छ र त्यसपछि निर्माण कार्य अघि बढ्छ।”
केन्द्र सरकारबाट बजेट प्राप्त भएपछि गण्डक चोकदेखि मितेरी पुलसम्मको खण्डमा ६ लेनको सडक निर्माणका लागि ठेक्का प्रक्रिया अघि बढाइने उनले बताइन् । सडक डिभिजन कार्यालयका अनुसार डिपिआर तयार हुन ३ देखि ४ महिना लाग्नेछ भने आगामी आर्थिक वर्षदेखि निर्माण कार्य सुरु हुने सम्भावना रहेको छ । निर्माण कार्य सम्पन्न हुन कम्तीमा दुई वर्ष लाग्ने अनुमान गरिएको छ।
कार्यालयका अनुसार भत्काइएका संरचनाको फोहोर व्यवस्थापन कार्य एक हप्ताभित्र सुरु गरिनेछ। सडक निर्माण कार्य सुरु अर्काे आर्थिक बर्षदेखि गरिने छ ।
यसअघि जिल्ला प्रशासन कार्यालय पर्साले शनिबार साँझ सूचना जारी गर्दै त्रिभुवन राजपथअन्तर्गत नेपाल–भारत मितेरी पुलदेखि गण्डक नहर चोकसम्मको सडक क्षेत्रभित्रका संरचना १२ घण्टाभित्र हटाउन निर्देशन दिएको थियो । सोही निर्देशनअनुसार २४ घण्टामै अधिकांश संरचना हटाइएको जनाइएको छ ।
वीरगंज मुख्य सडककाे दायाँबायाँकाे संरचनामा डाेजर चलेपछि यहाँका मुख्य बजार नै प्रभावित भएका छन् । डाेजरबाट भत्काइएका संरचनाहरुकाे सरफाइ नहुँदा वीरगंज मुख्य बजार क्षेत्र खण्डरमा परिणत भएकाे देखिन्छ ।
