वीरगंज । शनिबारदेखि सुरु हुने पाँचौं परवानीपुर गोल्डकप फुटबल प्रतियोगिताको सम्पूर्ण तयारी पूरा भएको आयोजकले जनाएको छ।
बिहीबार बिहान परवानीपुर खेल मैदानमा आयोजक शक्ति युवा क्लबले पत्रकार सम्मेलन गरी वैशाख ५ देखि १२ गतेसम्म सञ्चालन हुने प्रतियोगिताको सबै तयारी सम्पन्न भएको जानकारी दिएको हो।
एक सातासम्म चल्ने प्रतियोगितामा भारतको एक टोलीसहित नेपालका सात टोली गरी कुल आठ टोली सहभागी हुने संयोजक संजय मण्डलले बताए। प्रतियोगितामा आयोजक शक्ति युवा क्लब, वीरगंज युनाइटेड क्लब, वीरगंज युथ क्लब, रिगल हेटौडा एन्फा क्लब, नव जनजागृति युवा क्लब सिमरा, चिडियादह क्लब रौतहट, निजगढ फुटबल क्लब र यंग स्टार क्लबको सहभागिता रहनेछ।
“राष्ट्रका लागि खेलकुद, स्वास्थ्यका लागि खेलकुद” भन्ने नाराका साथ आयोजना गरिएको प्रतियोगिता करिब १७ लाख रुपैयाँको लागतमा सञ्चालन हुने सहसंयोजक दीपक यादवले जानकारी दिए। उनका अनुसार प्रतियोगिता प्रत्येक दिन साँझ ३ बजेदेखि ५ बजेसम्म हुनेछ।
प्रतियोगितामा प्रथम पुरस्कार २ लाख रुपैयाँ र द्वितीय पुरस्कार १ लाख रुपैयाँ राखिएको छ। साथै उत्कृष्ट डिफेन्डर, फरवार्ड तथा दैनिक उत्कृष्ट खेलाडीलाई नगद पुरस्कार प्रदान गरिने आयोजक क्लबका अध्यक्ष सुबोध श्रीवास्तवले बताए। प्रतियोगिताभरिका उत्कृष्ट खेलाडीलाई ५१०० रुपैयाँ नगद पुरस्कार प्रदान गरिनेछ।
प्रतियोगिता सफल बनाउन आयोजकले स्थानीय जनप्रतिनिधि, सुरक्षा निकाय, उद्योगी–व्यवसायी, खेलप्रेमी तथा सञ्चारकर्मीलाई सहयोग गर्न आग्रह गरेको छ।
पत्रकार सम्मेलनमा क्लबका उपाध्यक्ष हुलास यादव, महासचिव ध्रुव साह, कोषाध्यक्ष सोनालाल मण्डल, प्रशिक्षक पंकज चौधरी, पूर्व फुटबल खेलाडी बिनोद न्यौपाने, प्रहरी चौकी परवानीपुरका इन्चार्ज शक्ति श्रेष्ठ लगायतको उपस्थिति रहेको थियो।
यसअघि प्रतियोगिताको अन्तिम तयारी अन्तर्गत आयोजकले स्थानीय समाजसेवी, राजनीतिक दलका प्रतिनिधि, जनप्रतिनिधि, खेलाडी तथा सञ्चारकर्मीहरूको सहभागितामा अन्तरक्रिया कार्यक्रम पनि गरेको थियो। कार्यक्रममा सहभागीहरूले खेलकुदलाई राजनीतिबाट अलग राख्दै अघि बढाउनुपर्नेमा जोड दिएका थिए।
