वीरगंज । वीरगंज उद्योग वाणिज्य सङ्घले वीरगंज भन्सार कार्यालयको मुलगेट लगायत राजमार्ग तथा सहायक राजमार्गहरूमा स्थानीय तहबाट उठाइँदै आएको गैरकानूनी सवारी कर तत्काल अन्त्य गर्न सरकारसँग जोडदार माग गरेको छ।
सङ्घका अध्यक्ष हरि प्रसाद गौतमद्वारा जारी प्रेस विज्ञप्तिमा स्थानीय सरकारले वर्षौँदेखि भारतीय गाडी सहित विभिन्न सवारी साधनहरूबाट गैरकानूनी रूपमा सवारी कर उठाउँदै आएको उल्लेख गरिएको छ। गत फाल्गुनमा सम्पन्न निर्वाचनपछि गठन भएको नयाँ सरकारले उक्त कर हटाउन पहल गरेकोमा सङ्घले स्वागत समेत गरेकाे छ।
तर, संघीय सरकारको प्रयासका बाबजुद पनि स्थानीय सरकारले सवारी कर नउठाउन आलटाल गर्दै आएको तथा स्थानीय सरकार र प्रशासनबीच आवश्यक समन्वय हुन नसकेको अनुभूति भइरहेको विज्ञप्तिमा उल्लेख छ।
सङ्घले यस्तो गैरकानूनी कार्य तत्काल रोक्न सरकारका सबै सम्बन्धित निकायसँग प्रभावकारी पहल गर्न आग्रह गरेको छ।
यसैबीच, केही दिनअघि प्रमुख जिल्ला अधिकारी भोला दाहालको नेतृत्वमा गएको अनुगमन टोलीले १३ स्थानमा सञ्चालन हुँदै आएका ढाटहरूबाट कबाडी कर र सवारी करका रसिदका ठेलीहरू नियन्त्रणमा लिएको थियो।
प्रमुख जिल्ला अधिकारी दाहालसहित पर्साका प्रमुख प्रहरी उपरीक्षक सुदीप राज पाठक लगायतको सहभागिता रहेको अनुगमन टोली वीरगंज ड्राइपोर्ट, बहुअरी, जगरनाथपुर, परवानीपुर लगायतका स्थानमा पुग्दा अवैध असुलीमा संलग्न व्यक्तिहरू भागाभाग भएका थिए । तर अनुगमनको दुई दिनपछि पुनः अवैध असुली सुरु भएको पाइएको छ।
अनुगमन टोलीले राजमार्गमा कुनै किसिमको अवैध असुली नगर्न सम्बन्धित पक्षलाई कडा चेतावनी दिएको जनाएको छ। प्रमुख जिल्ला अधिकारी दाहालले अनुगमनकाे भाेलीपल्ट आफूसँग केही व्यक्तिहरू आए पनि गैरकानूनी असुली गर्न नमिल्ने भन्दै फर्काइएको र त्यसपछि पनि यस्ता गतिविधि दोहोरिएमा रोक्न प्रहरीलाई निर्देशन दिइसकेको जानकारी दिए।
