रौतहट । रौतहटको बौद्धीमाई नगरपालिका वडा नं. ८ सरमुजवामा “युवाका साथ नयाँ वर्ष” शुभकामना आदानप्रदान कार्यक्रम भव्य रूपमा सम्पन्न भएको छ। बौद्धीमाई नगरपालिकाका युवाहरूको पहलमा आयोजित उक्त कार्यक्रममा आम जनता पार्टीका अध्यक्ष प्रभु साह प्रमुख अतिथिका रूपमा सहभागी भएका थिए।
कार्यक्रमलाई सम्बोधन गर्दै अध्यक्ष साहले यस्ता कार्यक्रमले युवाहरूमा नयाँ जोश, उत्साह र आत्मविश्वास बढाउने विश्वास व्यक्त गर्दै सम्पूर्णमा नयाँ वर्ष २०८३ को हार्दिक मंगलमय शुभकामना व्यक्त गरे। उनले युवाहरू राष्ट्र निर्माणका मेरुदण्ड भएको उल्लेख गर्दै संगठित भएर विकास र समृद्धिको अभियानमा लाग्न आह्वान गरे।
नयाँ वर्ष २०८३ को अवसरमा सरमुजवास्थित गुजरा माई पिकनिक स्थलमा आयोजित कार्यक्रममा युवाहरूको उत्साहजनक सहभागिता रहेको थियो।
यसैबीच, आम जनता पार्टीका सचिवालय सदस्य रामशरण यादवका अनुसार अध्यक्ष साह पछिल्ला दिनहरूमा पर्सा, बारा र रौतहट जिल्लाका विभिन्न पालिकामा कार्यकर्तासँग भेटघाटमा सक्रिय रहेका छन्।
कार्यक्रमले युवामा नयाँ ऊर्जा र सकारात्मक सोच अभिवृद्धि गर्ने विश्वास व्यक्त गरिएको आयोजकले जनाएको छ।
