वीरगंज । पर्साका प्रमुख जिल्ला अधिकारी भोला दाहालको नेतृत्वमा आइतबार वीरगंजस्थित त्रिभुवन राजमार्ग क्षेत्रमा भइरहेको अवैध असुलीविरुद्ध अनुगमन गरिएको छ।
प्रमुख जिल्ला अधिकारी दाहालसहित पर्साका प्रमुख प्रहरी उपरीक्षक सुदीप राज पाठक लगायतको सहभागिता रहेको अनुगमन टोलीले वीरगंज ड्राइपोर्ट, बहुअरी, जगरनाथपुर, परवानीपुर लगायतका १३ स्थानमा सञ्चालन हुँदै आएका ढाटहरूबाट कबाडी कर र सवारी करका रसिदका ठेलीहरू नियन्त्रणमा लिएको हो।
अनुगमन टोलीले राजमार्गमा कुनै किसिमको अवैध असुली नगर्न सम्बन्धित पक्षलाई कडा चेतावनी समेत दिएको जनाएको छ।
एकीकृत जाँच चौकी (आईसीपी) वीरगंजबाट बाहिरिने मालवाहक सवारीसाधनबाट अवैध रूपमा रकम असुली हुँदै आएको विषयमा कालिका टाइम्स लगायत केही सञ्चारमाध्यमहरूले निरन्तर समाचार प्रकाशन गर्दै आएका थिए। त्यसपछि पर्सा क्षेत्र नं. १ का प्रतिनिधि सभा सदस्य हरि पन्तले प्रमुख जिल्ला अधिकारीसँग फोनमार्फत कुराकानी गर्दै अवैध असुली रोक्न समेत निर्देशन दिएका थिए।
ड्राइपोर्टदेखि परवानीपुरसम्म विभिन्न स्थानमा गुम्ती राखेर ‘कबाडी कर’, ‘ढाट’ तथा ‘सवारी व्यवस्थापन शुल्क’ जस्ता नाममा जबर्जस्ती रकम उठाइँदै आएको स्थानीयहरूले बताएका छन्।
अमित ठेक्का पट्टा र प्रभु कन्स्ट्रक्सनले लामो समयदेखि मालवाहक ट्रक, बस, ट्याक्टर तथा अन्य सवारीसाधनबाट अवैध रूपमा रकम असुल्दै आएका थिए। अहिलेको अनुगमनपछि यस्तो गतिविधि नियन्त्रणमा आउने अपेक्षा गरिएको छ।
