वीरगंज । नेपाल राष्ट्र बैंक वीरगंजको आयोजनामा शनिबार एक दिने वित्तीय साक्षरता प्रवर्द्धन सम्बन्धी पत्रकार अनुशिक्षण कार्यक्रम सम्पन्न भएको छ । मकवानपुरको हेटौंडामा आयोजित कार्यक्रममा सहभागी सरोकारवालाहरूले मुलुकको आर्थिक विकासलाई गति दिन नागरिकमा वित्तीय साक्षरता अनिवार्य रहेको बताएका छन्।
कार्यक्रममा विज्ञहरूले नागरिकको बैंकिङ कारोबार गर्ने क्षमता अभिवृद्धि नभएसम्म आर्थिक समृद्धि सम्भव नहुने धारणा व्यक्त गरे। उनीहरूले वित्तीय ज्ञान अभावकै कारण बैंकिङ प्रणाली प्रभावकारी रूपमा प्रयोग हुन नसकेको उल्लेख गरे।
कार्यक्रममा बोल्दै नेपाल राष्ट्र बैंक वीरगंज कार्यालयका निर्देशक सुशील पौडेलले वित्तीय साक्षरताको कमीका कारण बैंकहरूमा लगानीयोग्य रकम (तरलता) थुप्रिए पनि कर्जा लिने क्षमतामा वृद्धि हुन नसकेको बताए। उनका अनुसार बैंकिङ पहुँच पुगेका क्षेत्रमा समेत वित्तीय ज्ञान अभावका कारण कर्जाको माग घट्दो क्रममा रहेको छ।
निर्देशक पौडेलले आधारभूत तहसम्म बैंकिङ पहुँच विस्तार गर्न तथा सुरक्षित वित्तीय कारोबार सुनिश्चित गर्न सञ्चारकर्मीहरूको भूमिका महत्वपूर्ण हुने बताए। उनले मधेस प्रदेशमा पछिल्लो समय बैंकिङ अपराध बढ्दै गएको उल्लेख गर्दै वीरगंज कार्यालयमा दैनिक ५४ वटासम्म बैंकिङ स्क्यामका उजुरी आउने गरेको जानकारी दिए।
उनले समयमै बिल भुक्तानी, खर्च व्यवस्थापन, बचत तथा स्वास्थ्य बीमा र आपतकालीन कोष निर्माण जस्ता उपायले आर्थिक सुरक्षा सुनिश्चित हुने बताए।
अनुशिक्षण कार्यक्रममा बैंकका सहायक निर्देशक नरेश सर्राफले पत्रकारहरूलाई वित्तीय साक्षरतासम्बन्धी विषयमा लेखनमार्फत जनचेतना फैलाउन आग्रह गरे। पर्सा, बारा, रौतहट, मकवानपुर र चितवनका करिब ९० जना पत्रकार तथा कर्मचारी सहभागी कार्यक्रममा बैंक र सञ्चारकर्मीबीचको सहकार्य अझ सुदृढ हुने विश्वास व्यक्त गरिएको थियो।
यस्तै, सहायक निर्देशक विनय केशरीले बैंकिङ कारोबारका प्राविधिक तथा व्यावहारिक पक्षबारे जानकारी दिँदै नक्कली नोटबाट बच्न सतर्कता अपनाउन सुझाव दिए। उनले मुद्रास्फीति र विनिमय दरलाई ध्यानमा राखेर मात्र खरिद निर्णय गर्न तथा अनलाइन कारोबार गर्दा विश्वसनीयता सुनिश्चित गर्न आग्रह गरे।
कार्यक्रममा उपभोक्तालाई अनावश्यक खर्च नियन्त्रण, सेवा लागत तुलना, बैंक खाताको नियमित निगरानी तथा कागजातमा हस्ताक्षर गर्नुअघि आवश्यक परामर्श लिनुपर्नेमा जोड दिइएको थियो। साथै वस्तु खरिद गर्दा त्यसको उत्पत्ति र वातावरणीय प्रभावलाई समेत ध्यान दिन आग्रह गरिएको छ।
