वीरगंज । चुनाव जितेपछि राजधानी केन्द्रित भएर जनताबाट टाढा हुने प्रवृत्तिलाई तोड्दै पर्सा क्षेत्र नम्बर १ का सांसद तथा रास्वपा पर्सा सभापति हरि पन्तले वीरगञ्जमै निजी सचिवालय स्थापना गरेका छन्।
बिहीबार पर्सा–१ का अगुवा नेताहरूको उपस्थितिमा आयोजित एक समारोहबीच वीरगञ्ज–८ मा उक्त सचिवालयको उद्घाटन गरिएको हो। उद्घाटन गर्दै सांसद पन्तले आफू क्षेत्रबाहिर रहँदा पनि जनताका समस्या समाधानका लागि सचिवालयले सक्रिय भूमिका खेल्ने बताए।
उनले सचिवालयलाई सुदिश प्रजापतिको नेतृत्वमा १५ सदस्यीय टोलीमार्फत सञ्चालन गरिने जानकारी दिँदै केही दिनभित्रै पूर्ण टोली गठन गरेर सदस्यहरूको नाम र मोबाइल नम्बर सार्वजनिक गरिने बताए।
सांसद पन्तले सरकारी कार्यालयहरूमा सेवाग्राहीलाई सहज सेवा दिन निर्देशन दिइसकेको उल्लेख गर्दै अनावश्यक ढिलासुस्ती भए सचिवालयमा जानकारी गराउन आग्रह गरे। “अब जनताले प्रत्यक्ष रूपमा परिवर्तनको अनुभूति गर्नेछन्,” उनले भने।
उद्घाटन कार्यक्रममा रास्वपा पर्साका उपसभापति तुल्सा पौडेल, सचिव सुदिश प्रजापति, कोषाध्यक्ष दिलिप कुर्मी, क्षेत्रीय सभापति राम आर्या, महानगर सभापति अमन आलम, सचिव गौतम श्रेष्ठ लगायतका नेता तथा कार्यकर्ताहरूको उपस्थिति रहेको थियो।
यसैगरी, युबराज पटेल, दीपेन्द्र मण्डल, रामबाबु सिंह, महबुब आलम, सगिर अन्सारी, विशाल कुमार, सुमित चौरसिया, राजु गुप्ता, दिनेश गुप्ता, राम लामा, त्रिनेश गिरि, पूर्ण सापकोटा, सम्साद आलम, शन्नी गुप्ता, रामेश्वर साह, आलोक मिश्र, सालिक पौडेलसहित १९ वटै वडाका निर्वाचन परिचालन समितिका संयोजक, उपसंयोजक तथा शुभेच्छुकहरूको सहभागिता रहेको थियो। कार्यक्रमको सञ्चालन कृष्ण पासवानले गरेका थिए।
