वीरगंज । नेकपा (एमाले) का तर्फबाट पर्सा निर्वाचन क्षेत्र नम्बर–२ की प्रतिनिधिसभा सदस्य उम्मेदवार रिमा यादवले शनिबार वीरगंज महानगरपालिका–३ अन्तर्गत छपकैयामा घरदैलो कार्यक्रम सम्पन्न गरेकी छन्।
घरदैलो कार्यक्रममा स्थानीय बासिन्दाको उत्साहजनक सहभागिता देखिएको थियो। उम्मेदवार यादवलाई मतदाताले फूलमाला तथा गम्छा ओढाएर स्वागत गरेका थिए भने केहीले मिठाई खुवाउँदै जितको शुभकामना व्यक्त गरेका थिए।
उक्त अवसरमा रिमा यादवले जनताको सुख–दुःखमा सधैं साथ दिने प्रतिबद्धता व्यक्त गर्दै मधेश आन्दोलनको बलबाट स्थापित संघीयता जोगाउन एमालेलाई मतदान गर्न आग्रह गरिन्। वर्तमान समयमा मुलुक जोगाउने र अस्थिरता निम्त्याउने शक्तिबीच ध्रुवीकरण भइरहेको उल्लेख गर्दै उनले देशको स्थायित्व, विकास र समृद्धिका लागि एमालेको सूर्य चुनाव चिन्हमा मतदान गर्न अपिल गरिन्।
एमालेले अघि सारेको राष्ट्रियता सुदृढीकरण, आर्थिक समृद्धि तथा समाजवाद उन्मुख विकासको मार्गलाई आत्मसात् गर्दै अघि बढेको बताउँदै उनले चुनावी समयमा मात्र सक्रिय हुने नेतृत्वबाट सचेत रहन मतदातालाई आग्रह गरिन्।
गरिबी न्यूनीकरण, रोजगारी सिर्जना, कृषि तथा पर्यटन प्रवर्द्धन, स्थानीय उद्योग विस्तार, महिला सशक्तीकरण तथा युवालाई अवसर सिर्जना आफ्ना प्रमुख प्राथमिकता रहने उनको प्रतिबद्धता थियो। साथै सडक, विद्यालय, अस्पताल, धार्मिक संरचना, मसानघाट, खानेपानी, सिँचाइ तथा विद्युत् विस्तारलगायतका क्षेत्रमा काम गरेको दाबी गर्दै संसद्मा पर्साका मुद्दाहरू निरन्तर उठाउँदै आएको उनले स्मरण गराइन्।
घरदैलो कार्यक्रमका क्रममा स्थानीयले उठाएका विभिन्न समस्याको समाधानका लागि पहल गर्ने प्रतिबद्धता पनि उनले व्यक्त गरिन्। वर्तमान राजनीतिक परिस्थितिमा राष्ट्रिय अखण्डता, संविधान तथा संघीय संरचना सुदृढ गर्न एमाले नेतृत्वको भूमिका महत्वपूर्ण रहने उनको धारणा थियो।
कार्यक्रममा एमालेका केन्द्रीय सदस्य विजय सरावगी, मधेश प्रदेश उपाध्यक्ष विचारी यादव, जिल्ला सचिव महेश दास, वीरगंज महानगरका लेखा समिति संयोजक अजय साह, प्रेस चौतारी पर्साका अध्यक्ष निरञ्जन मिश्र लगायत स्थानीय नेता तथा कार्यकर्ताको उल्लेखनीय उपस्थिति रहेको थियो।
