वीरगंज । पर्सा निर्वाचन क्षेत्र नं. ३ का नेकपा एमालेका उम्मेदवार रुपेश कुमार पाण्डेयविरुद्ध दायर गरिएको रिट निवेदनमा सर्वोच्च अदालतले अन्तरिम आदेश जारी नगर्ने निर्णय गरेको छ।
सर्वोच्च अदालतका न्यायाधीश हरिप्रसाद फुयाल र नित्यानन्द पाण्डेयको संयुक्त इजलासले पर्सा क्षेत्र नं. ३ कै नेपाली कम्युनिष्ट पार्टी (नेकपा) का उम्मेदवार छोटेलाल प्रसाद यादवले दायर गरेको उत्प्रेषण मुद्दामा सुनुवाइ गर्दै यस्तो आदेश गरेको हो।
नेकपाका उम्मेदवार यादवले पाण्डेय र निर्वाचन आयोग, कान्तिपथ काठमाडौंलाई विपक्षी बनाउँदै उम्मेदवारी खारेज गर्न माग गरी रिट दायर गरेका थिए । रिटमा बैंक ऋण नतिरेको विषय उठाउँदै कर्जा सूचना केन्द्रको कालोसूचीसम्बन्धी प्रसंग उल्लेख गरिएको थियो।
यसअघि निर्वाचन आयोगले कर्जा सूचना केन्द्रबाट प्राप्त विवरणका आधारमा पाण्डेयसँग स्पष्टीकरण मागेको थियो । उजुरी परेपछि आयोगले कानुनी प्रक्रिया अघि बढाएको र सोही सन्दर्भमा मुद्दा सर्वोच्च अदालतमा पुगेको थियो।
सर्वोच्च अदालतले अन्तरिम आदेश जारी नगर्ने निर्णय गरेसँगै पाण्डेयको उम्मेदवारी यथावत रहने भएको छ । अदालतको आदेशपछि उनको विरुद्ध परेको मुद्दा प्रभावहीन बनेको छ ।
यस विषयमा एमालेका नेताहरूले पाण्डेयको लोकप्रियताबाट आत्तिएर विपक्षीले अनावश्यक दुःख दिन अदालतसम्म पुगेको आरोप लगाएका छन् । सर्वोच्च अदालतको आदेशपछि मतदातामा देखिएको अन्योल पनि हटेको एमालेले जनाएकाे छ।
