वीरगंज । नेपाली कांग्रेस पर्सा क्षेत्र नम्बर–४ का प्रतिनिधिसभा सदस्य उम्मेदवार रमेश रिजालले जगरनाथपुर गाउँपालिका–५ चिल्झपट्टीमा शनिबार घरदैलो तथा जनता दर्शन कार्यक्रम सम्पन्न गरेका छन्।
घरदैलोका क्रममा उम्मेदवार रिजालले स्थानीय बासिन्दासँग प्रत्यक्ष भेटघाट गर्दै आफ्ना चुनावी एजेन्डा तथा विकास योजनाबारे जानकारी गराएका थिए। उनले क्षेत्रको सडक, शिक्षा, स्वास्थ्य, सिंचाइ तथा रोजगारीलाई प्राथमिकतामा राखेर काम गर्ने प्रतिबद्धता व्यक्त गरे।
कार्यक्रममा स्थानीयवासीले रिजाललाई स्वागत गर्दै आगामी निर्वाचनमा सहयोग र समर्थन रहने विश्वास दिलाएका थिए। क्षेत्रीय सभापति श्रीकान्त प्रसाद यादवसहित पार्टीका स्थानीय नेता–कार्यकर्ता तथा शुभेच्छुकहरूको उल्लेख्य सहभागिता रहेको थियो।
कांग्रेसले पर्सा–४ मा संगठन सुदृढ बनाउँदै घरदैलो, टोलसभा र प्रत्यक्ष संवादमार्फत चुनावी अभियानलाई थप तीव्र बनाएको जनाएको छ। निर्वाचन नजिकिँदै जाँदा चिल्झपट्टीमा रिजालको सक्रियताले कांग्रेस कार्यकर्तामा उत्साह थपिएको बताइएको छ।
