वीरगंज । जनमत पार्टी पर्सा निर्वाचन क्षेत्र नम्बर–१ का प्रतिनिधिसभा सदस्य पदका उम्मेदवार ओमप्रकाश सर्राफले बुधबार आफ्नो संकल्प पत्र सार्वजनिक गरेका छन् । पत्रकार सम्मेलनमार्फत सार्वजनिक गरिएको संकल्प पत्रमा उनले वीरगंजकाे समग्र विकास, रोजगारी सृजना र सुशासनलाई प्राथमिकतामा राखेको बताएका छन् ।
संकल्प पत्र सार्वजनिक गर्दै सर्राफले जनताको प्रत्यक्ष सहभागिता र सहकार्यबाट परिवर्तन सम्भव हुने विश्वास व्यक्त गरे । “व्यवसाय, समाजसेवा र जनसम्पर्कको अनुभवले मलाई विकासका लागि जनसहभागिता अनिवार्य भएको स्पष्ट बोध गराएको छ,” उनले भने ।
उनले वीरगंजलाई रोजगारीयुक्त, व्यवस्थित र समृद्ध शहर बनाउने प्रतिबद्धता जनाउँदै बेरोजगारी, कमजोर स्वास्थ्य सेवा, अव्यवस्थित सडक, फोहोर व्यवस्थापन तथा भ्रष्टाचारजस्ता समस्यालाई समाधान गर्ने लक्ष्य राखेको बताए ।
संकल्प पत्रमा सर्राफले आफ्नो नीतिगत पहलअन्तर्गत ‘ड्रिम प्रोजेक्ट’ समेत अघि सारेका छन् । जसअन्तर्गत लामो समयदेखि अधुरो रहेको नारायणी रंगशालालाई अन्तर्राष्ट्रिय मापदण्डअनुसार आधुनिक क्रिकेट तथा बहुउद्देश्यीय रंगशालाको रूपमा विकास गर्ने योजना उल्लेख गरिएको छ । उनले नेपाली क्रिकेटले टी–२० विश्वकप २०२६ मा नयाँ पहिचान बनाएको सन्दर्भ जोड्दै वीरगंजलाई राष्ट्रिय तथा अन्तर्राष्ट्रिय खेलकुद केन्द्रको रूपमा स्थापित गर्ने लक्ष्य रहेको बताए ।
यस्तै, वीरगंजकाे जीवनरेखा मानिने सिर्सिया नदीलाई प्रदूषणमुक्त बनाउन आधुनिक ढल तथा फोहोर प्रशोधन प्रणाली, उद्योगजन्य प्रदूषण नियन्त्रण, नदी किनार हरियाली र दीर्घकालीन सरसफाइ अभियान सञ्चालन गर्ने प्रतिबद्धता व्यक्त गरिएको छ ।
स्वास्थ्य क्षेत्रतर्फ नारायणी अस्पताललाई अन्तर्राष्ट्रिय मापदण्डअनुसार आधुनिक र सुविधासम्पन्न स्वास्थ्य केन्द्रका रूपमा स्तरोन्नति गर्दै वीरगंजलाई प्रदेशकै प्रमुख स्वास्थ्य हब बनाउने लक्ष्य राखिएको संकल्प पत्रमा उल्लेख छ ।
संकल्प पत्रको अन्त्यमा सर्राफले मतदातालाई “लाउडस्पिकर हर्न” चुनाव चिह्नमा मतदान गरी विजयी बनाउन आग्रह गरेका छन् ।
