वीरगंज । पर्सा निर्वाचन क्षेत्र नं. १ का प्रतिनिधिसभा सदस्य उम्मेदवार ओमप्रकाश सरार्फले घरदैलो अभियानलाई सशक्त बनाउँदै मतदातासँग प्रत्यक्ष संवाद गरेका छन् । जनमत पार्टीका तर्फबाट उम्मेदवार सरार्फले वीरगंज महानगरपालिका वडा नम्बर–१५ भिस्वा र वडा नम्बर–२३ सबैठवामा सन्ध्याकालीन चुनावी सभा गर्दै स्थानीय बासिन्दासँग भेटघाट गरेका हुन्।
घरदैलो अभियानका क्रममा सरार्फले स्थानीयसँग प्रत्यक्ष संवाद गर्दै उनीहरूले भोगिरहेका समस्याबारे जानकारी लिएका थिए । वडा नम्बर–१५ भिस्वामा सडकको दयनीय अवस्था, ढल निकासको अभाव, खानेपानी समस्या र सरसफाइ व्यवस्थापनको कमजोरी प्रमुख रूपमा उठाइएको थियो। स्थानीयहरूले वर्षायाममा सडक हिलाम्मे हुने, नालाको अभावका कारण पानी जम्ने तथा दुर्गन्ध फैलिने समस्या समाधान गर्न माग गरेका थिए।
त्यसैगरी वडा नम्बर–२३ सबैठवामा कच्ची सडक, अव्यवस्थित ढल, सडकबत्तीको अभाव, स्वास्थ्य सेवामा पहुँचको कमी तथा युवाहरूका लागि रोजगारी अवसर नहुँदा उत्पन्न समस्या स्थानीयले उठाएका थिए। आधारभूत पूर्वाधार विकास, सुरक्षित सडक, नियमित सरसफाइ र स्वास्थ्य सेवा विस्तारलाई प्राथमिकतामा राख्न स्थानीयले आग्रह गरेका छन्।
स्थानीयको गुनासो सुन्दै उम्मेदवार सरार्फले चुनाव जितेर जनताको विश्वासको कदर गर्ने प्रतिबद्धता व्यक्त गरे। “जनताले देखिने र महसुस हुने विकास चाहेका छन्। सडक, ढल, खानेपानी, सरसफाइ र स्वास्थ्य सेवा जस्ता आधारभूत आवश्यकतामा सुधार ल्याउनु नै मेरो पहिलो प्राथमिकता हुनेछ,” उनले भने।
सरार्फले जनताको सुझावलाई आफ्नो चुनावी एजेन्डाको केन्द्रमा राख्ने बताउँदै स्थानीयस्तरमै रोजगारी सिर्जना, युवा उद्यमशीलता प्रोत्साहन, साना तथा मध्यम व्यवसायलाई सहयोग र पूर्वाधार विकासलाई गति दिने योजनासमेत सुनाए। जनतासँग प्रत्यक्ष संवाद गर्नु नै वास्तविक राजनीति भएको उनको भनाइ थियो।
घरदैलो अभियानमा युवा, महिला तथा ज्येष्ठ नागरिकहरूको उत्साहजनक सहभागिता देखिएको थियो। स्थानीयहरूले यसपटक विकास र काम गर्ने उम्मेदवारलाई समर्थन गर्ने बताएका छन्।
जनमत पार्टीका नेता तथा कार्यकर्ताहरूको सक्रिय सहभागितामा सम्पन्न कार्यक्रमले क्षेत्र नं. १ मा चुनावी माहोल थप तातेको संकेत गरेको छ। सरार्फले आगामी दिनहरूमा अन्य वडाहरूमा पनि घरदैलो अभियानलाई निरन्तरता दिने बताएका छन्।
